每逢萬聖倍思Ghost Halloween扮乜好？
text: Chun
Hey，你諗好今晚Halloween扮乜未？如果未，不妨參考以下各項。咁當然你有權乜都唔扮，做自己！
大量小……丑女出沒
如無意外——應該都冇乜意外，今年萬聖節肯定有大把小丑女出沒，高矮肥瘦齊備，唉……不過咁，扮小丑女都好過扮嗰啲Creepy Clown四出嚇人，真係見鑊打鑊。
何文田屍殺列車
《屍殺列車》掀起喪屍熱潮，建議你不妨挑戰何文田站嗰562級樓梯，而且一口氣行完，行完嗰下，應該好似《屍殺》啲喪屍咁，疲累到喺地下典嚟典去。
笠個面具就扮到
如果唔想太麻煩，不妨考慮扮荷里活四大殺人王：《黑色星期五》Jason、《月光光心慌慌》Michael、《猛鬼街》Freddy以及《德州電鋸大屠殺》leatherface，反正只要笠個面具就OK，而且夠穩陣（不過悶囉）。
怪佢過分美麗
伊藤潤二大hit，不妨扮佢筆下嗰位有史以來最淒美而又離奇的恐怖角色：富……江。富江生得超靚，靚到令身邊所有男人甘心做兵，但同時又怪佢過分美麗，忍唔住生劏並肢解佢……當然，你扮富江時唔使做戲做全套。
嚇Cute死
時移勢易，Halloween已經唔使一定要扮到懶係嚇人，扮cute都一樣得——例如扮Minions。不過，如果你駕馭唔到，隨時嚇cute死人。
