一齊等！《藍色海洋的傳說》煲前熱身！
text: Bonnie
下個月 16 號先播，你叫我點等！你叫我點等吖！
喺大家義無反顧地等住跳入呢個藍色 ocean 之前，與其日日篤住個 planner ，不如 warm up 一下。
點解要睇？全智賢產後復出、李敏鎬久違電視三年之作。
心急睇到連條 22 秒預告片都狂 loop——睇到全智賢個 body 靚過生之前；睇到李敏鎬岸邊沉思 close up 靚到無死角；睇到仙境一樣的帛琉海岸 sea view 靚成咁！由《來自星星的你》編劇朴智恩加《城市獵人》導演陳赫聯手作品，贏在海岸綫！
上次千頌伊是明星套套名牌，今次扮條由朝鮮時代生存到現代的千歲人魚，冇衫着就假嘅，但人魚造型超性感大 show 女神（聽聞拍劇前秘練過的）婀娜泳姿及完美 body（咪太興奮住，劇情會交代人魚岸上生活），登陸現代首爾後的人魚 fashion 依然飄逸，隨時靚過千頌伊！
長腿 oppa 又點？佢堅忙，忙在一人分飾兩角（聽聞第一次），即係鏡頭飛下去古代又瞬間轉移返現代（睇慣韓劇你懂的）。前世今生非常割裂，喺古代是個貴族富二代，喺現代是集團式職業老千，憑住懶係高嘅智慧與堅係型嘅外表不停換身份呃人，呢個無賴呃盡天下女人最後呢……咪對條傻魚動咗真感情咯。
人物性格鋪晒出嚟，估到齣劇講乜？定情位在古代，善良貴族 oppa 苦口婆心叫漁夫將人魚送返大海，救命之恩人魚銘記於心。來到現代容貌更勝以前的人魚將溺水的時裝 look oppa 救上岸，就咁你救我救你，前世今生陸地海洋交錯糾纏，愛火不可收拾。補充一點：齣劇改篇自韓國首部野史集《於於野談》中的人魚故事，雖然大家都應該冇拜讀過呢部名著 anyway……
預告片全智賢率先講咗句淒美對白：「不論有幾辛苦，我都會克服，我一定會走到你身邊。」上岸 so easy，早排有網民喺西班牙外景時影到美人魚同 oppa 拍拖食雪糕仲識踩 bicycle，似乎陸地拍拖生活又好 sweet 喎！鯨乾水後的人魚會否突變野蠻女友？適應陸上生活又有幾甩轆？ 一個字：要等。
有冇 surprise 先？都敏俊c 會喺外星返嚟探下拍擋？Confirm 亮相嘅有 f(x) 成員 Krystal，佢同李敏鎬之前喺《繼承者們》合作過大家非常咁喜歡；仲有又係《繼承者們》做 oppa 阿媽的金成玲。
1116 有得睇《藍色海洋的傳說》！1116 有得睇《藍色海洋的傳說》！大家一齊 keep 住呢個亢奮心情，慢慢等。
