石原！新垣！大好きです！
text：chun
石原聰美，靚！新垣結衣，又係靚！點揀？
Hey你估真係有得畀你揀咩……說的只是兩位分別孭飛的秋季日劇《校閱女孩》&《逃跑雖可恥但有用》，同時熱播中，同樣掀起話題，真係唔知睇邊齣好。
《校閱女孩》— 石原聰美
先講講兩齣劇掀起話題的原因。《校閱女孩》中的石原，矢心成為女性潮流雜誌編輯，所以極度注意打扮！基本上，每一集佢都例牌要換三、四套衫先安樂，每一set仲要唔同style，非常高難度，而共通點是——每一套都著得石原好靚（靚女著乜都靚）！
《逃跑雖可恥但有用》— 新垣結衣
至於新垣，喺《逃跑雖可恥但有用》中，衣著方面及唔上石原咁繽紛，但重點放在劇集後——每集播片尾曲時，都會伴隨新垣一隻超級極度可愛兼而有之絕對令你目不暇給的家居舞！單係呢隻舞，已經喺YouTube突破五百幾萬點擊！（截至目前為止，我本人都睇咗五十六次，數字還持續增加）
--------------------------------------------------------------------------------
咁其實兩齣劇分別講乜？先講《校閱女孩》。矢心成為女性潮流雜誌編輯的河野悅子（石原聰美），終於成功被出版社聘請——點知請咗嚟做校對。每一集，就係交代佢面對不同類型校對工作，由最初睇唔起呢份工，到漸漸明白校對的重要，體驗「平凡不簡單」這道理。
-------------------------------------------------------------------------------
《逃跑雖可恥但有用》呢，就交代森山美栗（新垣結衣）明明擁有臨床心理士資格，不過一直搵唔到長工（黐綫有冇搞錯？），被迫炒散，點知到最後連散工都冇得撈，在老竇安排下，去了由星野源餘演的單身中年男屋企做清潔，更譜出一段「契約婚姻」。睇落，冇《校閱女孩》咁喜劇味，但夠細膩。
論衣著，《逃跑雖可恥但有用》中的新垣簡單得來清爽舒服，而且劇組唔知有意定無意，經常close up新垣個天然靚 / 萌樣，相當治癒，煩惱盡消！搞到我每日返工前放工後以及入睡前都要望一望。而因為特殊工作性質，我又好渴望擁有石原呢位校對（美）女……所以……我只能夠兩齣劇都煲。
