咩玩法？出賣年齡之掌上遊戲機！
Text: Bonnie
PlayStation VR 終於出！好心急進入虛擬現實世界吖！
冷靜啲先，不如先除低你隻 VR 眼鏡，睇睇下面幾部兒時令你趨之若鶩的中古掌機，在那個沒有VR只有LR——即控制個角色行左行右，一樣令機迷廢寢忘餐爆機方休！Honestly，你玩過幾多部先？
「Game & Watch」乜東東？任天堂 80 年推出第一部液晶掌機 ，9cm x 6cm 超袖珍，但以 game 論 game 就就超弱囉。好似呢款右上印住 「Fire」 （人稱消防救美）的 game 不過左左右右重覆地將不斷從高空跌落嚟嘅傷者「彈」入救傷車。而啲傷者，細過粒豆豉囉！
Bandai 82 年推出的掌機「悪霊の館」，勁在翻蓋設計，頭兩關打蝙蝠打吸血鬼，終極一關直驅惡靈館揭開棺材打惡靈大佬。更勁是太陽能，三十幾年後今日仲玩到，感動到喊吖！
一串唔 sure 點讀的機名 「Otto Dokkoi」， 由 TAKATOKU TOYS 83 年推出。點玩？駕駛員要好機智地上下左右避開打橫飛埋嚟嘅隕石去救公主，同時又射下飛彈。爆機又點？得到公主香吻乙個！
Bandai 85 年之作「PRP SOCCER」，家用足球 game 始祖，好玩在可以好親密咁迫埋一齊雙打。
任天堂 89 年推出更震撼世界的 Game Boy（GB），1989 年推出後不斷改良。大家都超熟的五粒掣︰「A」、「B」、「SELECT」及「START」加個方向鍵。就係咁，少年時代兩隻手指公就未得閒過，發夢都見到俄羅斯方塊飄過。
Game Boy Advance（GBA），千禧後推出的第二代。多咗個彩色TFT 液晶螢幕唔使講，最勁是機頂多咗「L」、「R」鍵，令你兩隻食指同時地唔得閒。