Halloween 7 大玩樂提案 應節嚇一嚇

1 海洋公園 捉鬼敢死隊

如是海洋公園哈囉喂 diehard fans﹖唔使我提，你都會去奪命尖叫先安落，今年同樣是全日祭，一個價錢由朝玩到晚，小朋友日間去鬼屋充滿歡樂，另可睇表演騷及古惑糖果村攞糖。大人梗係挑戰非常重口味，觸及恐怖底線的「16 禁」，以及「捉鬼敢死隊Live！」鬼屋，勇闖電影主題場景布置，逃出喪屍惡鬼突然出現鬧鬼大宅、凶靈地下鐵、紐約時代廣場等關卡。

【info】海洋公園哈囉喂全日祭

日期︰10 月 2 日、7 日至 10 日、14 日至 16 日、20 日至 23 日、27 日至 31 日
時間︰10am - 11pm
票價︰成人$385、3 至11 歲小童$193．哈囉喂優越門票票價．成人$690；3 至11 歲小童$345（透過海洋公園網站或旅行社購票，於海洋公園正門售票處購票成人$730，3 至11  歲小童$365）
學生嘩鬼特別優惠：學生逢星期四、五八折優惠價購買入場門票，12 歲或以上學生$308、3 至11 歲學生$154（哈囉喂優越門票不設優惠）
註︰優越門票持有者可獨家進入 4 個哈囉喂景點的秘密暗室、無限次優先進入所有哈囉喂景點、包$200 園內餐飲及紀念品優惠券及哈囉喂精美紀念品一份等
查詢︰3923 2323

網址：http://halloween.oceanpark.com.hk 

2 迪士尼樂園  新鬼屋登場

真心話，今年入香港迪士尼樂園慶祝萬聖節，氣氛一定比去年好，起碼有新驚嚇點「詭夢實驗室」，新夜間「迪士尼惡人大出巡」，由邪惡皇后與巫師賈方及一眾迪士尼惡人擔大旗，勝在有新鮮感！仲有，首次換上萬聖節新裝迪士尼小熊 Duffy 與 ShellieMay 的最新好友——貓畫家小東尼 Gelatoni，粉絲必去集郵 齊 selfie！你問我邊 part 最驚，我最驚萬聖節精品畀人買晒囉！

【INFO】Disney Halloween Time——反轉迪士尼

日期︰即日至 10 月 31 日
地點︰香港迪士尼樂園．港人專享雙重節日
優惠票價︰即日至 11 月 13 日，香港居民只需分別以$428 或$599，即可於香港迪士尼樂園官方網站 （www.hongkongdisneyland.com）購買「雙重節日『玩轉迪士尼』優惠」之小童或成人套票，持套票者可即日至 12 月 15 日期間（不包括 10 月 28 日及 29 日）暢遊樂園兩次，更享有 9 折餐飲和購物優惠，以及迪士尼朋友造型雪條買一送一優惠。
查詢︰www.hongkongdisneyland.com

3 領展 免費玩「屍囚之路」

免費比鬼嚇，唔係唔去嘛！今年領展樂富廣場推出「「屍囚之路」鬼屋，參加者先穿上特製囚衣拍下犯人照，挑選最終成屍方式，中間穿越不同陰森恐佈的囚室。最猛係，鬼魂及喪屍將隨時在空氣中突襲浮現（運用 3D 立體浮空投影技術），個心真係離一離！另外，商場與珠海長隆海洋王國合作，設有『喪』玩嘉年華活動，設有多個鬼怪攤位遊戲。 

【info】屍囚之路

日期︰即日至 10 月31 日逢星期五至日、公眾假期及萬聖節當日（10 月 7 日除外）
時間︰4pm - 10pm
地點︰領展樂富廣場．免費開放
註︰於場內或指定商場消費滿$400，憑兩張同一商場之即日機印發票，即可換領『喪』玩快證套票
網址：http://www.linkhk.com/tc/Pages/Index.aspx

4 蘭桂坊 玩 apps 捉鬼有著數

萬聖節去蒲，蘭桂坊氣氛爆燈，入夜成條街都係「鬼」！打算去蘭桂坊嘅朋友，記得先下載新推的 LKF Monster Mash 手機應用程式，只要協助遊戲主角尋回被巫婆捉走的女友 Candy，每於蘭桂坊熱點捕捉到一隻喪屍，即可換取餐飲娛樂優惠。另外，WE LIKE HK 將於 10 月 31 日 6pm -10pm，設免費萬聖節扮鬼扮馬化妝間，應節變身話咁易。

5 山頂廣場 小丑驚嚇遊樂車

唔係去山頂廣場「小丑．血聲．樂園」被嚇過，都唔知自己原來有小丑恐懼症候群，那血紅大嘴巴，配陰森笑聲、怪異叫聲好得人驚呀！講明先，鬼屋唔係好大，玩家坐在遊樂場車上，戴上內置耳機的頭盔，聽令人起晒雞皮的呼吸聲、瘋狂電鋸聲等，聲音導航走過小丑遊樂場景，咁小丑當然唔知幾時殺出！每位遊戲參加者玩完，可獲場內拍攝的紀念照片乙張。

【INFO】小丑．血聲．樂園

日期︰即日至 10 月 30 日逢星期六、日及公眾假期及 10 月 31 日
時間︰2pm - 9pm（10 月 31 日 7pm - 9:30pm）
地點︰山頂廣場一樓 1 號舖
參加方法︰於場內消費滿 $100或以上，即可換領當日入場券一張，先到先得，換完即止。

6 銅鑼灣 Fashion walk 萬聖節巡遊

銅鑼灣 Fashion walk 冇鬼屋體驗，但有萬聖節派對及巡遊，留意日期非 10 月 31 日，係 10 月 28 日，咪搞錯日子。當日一眾童話故事人物盛裝出巡，遊走 Fashion Walk 主要街道，散播萬聖節氣氛，想參加萬聖節派對，記得先網上登記，參加者可享用節日小吃、參加互動遊戲，包括糖漬蘋果製作、塔羅占卜等，亦可在場內的 Photo Booth 拍照留念。另外，即日起，Fashion Walk 指定商戶會舉辦不同主題的萬聖節工作坊，而食街多間餐廳推出萬聖節限定美食。

【info】萬聖節巡遊

日期︰10 月 28 日
時間︰7:30pm、9pm
地點︰Fashion Walk（包括記利佐治街、百德新街、京士頓街及食街）﹔萬聖節派對
日期︰10 月 28 日．時間︰8pm -10pm
地點︰Fashion Walk 食街
參加方法︰登入網頁 www.timeout.com/styloween  登記

7  又一城  VR 虛擬驚魂

有玩過 VR 鬼屋虛擬遊戲的朋友，都知獨自面對驚嚇，避無可避！又一城為大家準備 HalloVR 感官體驗，大人驚嚇版，故事背景設定為舊屋邨，獨自走進藏着屍體的單位，按提示找方法逃離單位﹔小朋友版則是妖精遊樂場，體驗與一位家長同行，二人戴上眼罩進入虛擬遊樂場，並用搖控器收集糖果，同時要避開四周的妖精攻擊，完成任務。

【INFO】HalloVR 感官體驗

日期︰即日至 11 月 13 日
地點：九龍塘又一城 UG 層 M2 位置
時間：  星期一至五12 nn - 9pm、星期六、日及公眾假期10am -9pm
費用：單次遊戲體驗$60，購買探險王通行證$100，可參與香港屋邨靈異探索及妖精遊樂場。妖精遊樂場設有二人同行價$100。