貞子好笑啲？定伽椰子好笑啲？
文：Chun
本年度最重型「笑片」（大誤）《貞子vs伽椰子》上映嘞！
作為日本國民級兩大女鬼貞子 & 伽椰子，曾經是嚇死人代表，如今，卻成為靈界吉祥物，實在成何體統……點解會咁？貞子 & 伽椰子究竟搞乜鬼？
貞子原初設定：只要你有幸睇過嗰餅被詛咒的錄影帶，就會接到一個只得怪聲的來電，然後，你瀨嘢了，七日後貞子就會嚟搵你……但去到2012年《貞子3D》，貞子可能嫌七日太長，又或者唔想你返多七日工先死咁慘，所以改為兩日後就現身，好忙！貞子很累，但貞子不說～（仲有，明明話餅帶受到詛咒但你死都要睇，係咪抵死？）
貞子最初現身時，電視仲係大大部、手機仲係只用來打電話的年代，而貞子本人必定透過電視熒幕爬出嚟；但到了《貞子3D》（冇錯，又係呢一部），已經與時並進，可以喺任何有「芒」嘅地方爬出嚟——Yes，手機都一樣得！非常快捷方便！
貞子，也可以好cutie，只要變身成Hello Kitty。又係《貞子3D》呢部改變貞子一生的劃時代電影，有關方面竟然找來Hello Kitty合作宣傳！——我喺度諗，如果「Hello貞子」由我部電視爬出嚟，嗰一刻，我應該大聲驚叫？定係開心到高歌活希兒（唯一一首）首本名曲《Hello Kitty成為朋友》呢？嘻。
嚟多張《貞子3D》宣傳活動相。當睇見成棚貞子正從電視爬出來的宣傳品放喺面前，我想說的是：你哋成班做乜鬼吖XDDDDDD？
最早發現貞子潛在搞笑因子的，是化骨龍——早在1999年，張家輝已用化骨龍身份扮過一次貞子，無奈由電視機爬出嚟嗰陣，kick住咗。
相比貞子，伽椰子冇咁戲劇性的搞笑轉生史，because伽椰子一開始就充滿喜劇感……生前慘死的她，每次現身都不能正正常常咁行，而係從一啲好刁鑽鬼祟的地方好艱辛咁爬過嚟，實在我見猶憐，但又忍唔住笑。伽椰子能夠擁有咁澎湃喜劇感，佢個乘仔俊雄亦居功至偉。俊雄君每次現身都冇著衫（但堅持一定著褲），露出雪白肌膚，嚇人方式就是——擘大個口得個窿。而為宣傳部戲，電影公司竟然幫兩母子拍咗輯日常生活照，笑聲笑聲滿載溫馨。
貞子同Hello Kitty合作，伽椰子俊雄亦有推出商品——就係呢款杯緣子嘞。問題係，畀佢哋兩母子咁爬過，呢隻水杯會否從此蒙上咒怨？
最後講番齣戲——嘩真係好恐怖呀！XDDDDDDD！
