歐聯啫，有幾頂尖？

為甚麼說睇歐聯決賽是最項尖的睇波成就？因為：

1. 參賽的都是各大歐洲聯賽如英超、西甲、意甲、德甲中的冠軍至第四名球隊；

2. 相較於四年一次為世界盃埋班練波，球星一定是跟自己球會的隊友有默契得多，賽事質素相對更高；

3. 如果講質素好抽象，我們講錢——兩隊決賽球隊會各獲得 16,613 張門票，售予自己的球迷，價錢由 60 歐元至 513 歐元不等，如果非球會球迷就要另覓途徑。

4. 4 月時還未知道決賽隊伍誰屬，在售票平台 StubHub 上比較便宜的 Category C 門票，都要 22,000 港元一張！而在 5 月 8 日熱刺出綫晉級時，就連最貴的 40,000 港元門票都秒殺而空，去到決賽日，還有可能買到的門票只有貴賓區，連餐飲服務一張門票 6,900 歐元。

5. 連決賽的球場都一定要是頂級球場，今屆的熱刺大戰利物浦，是在容納到 68,000 人的馬德里體育會主場——萬達大都會球場（Wanda Metropolitano）。

利物浦以 2 比 0 勝出，拿下第 6 次歐聯冠軍。睇電視好睇，但球員親自走到你面前鞠躬致謝呢？現場才有！

開賽前幾個小時市內會有指定的 Fan Park，利物浦球迷的根據地是 Avenue De Felipe II，現場會有戶外演唱會，相信差不多有上萬人參加，根本一街都是利迷。

熱刺球迷的位置則是 Plaza de Colon，雖然是首次進軍歐聯決賽，人數還是相對少一點——但也有上千人在公園飲啤酒吹波經。

睇波即飛 香港利迷如是說

專誠由香港直飛馬德里的利迷（左起）：Jim，陳公，佛明奴

他們在 2018 年的烏克蘭基輔目睹皇家馬德里擊敗利物浦，立即約定今年利物浦再入決賽的話一定要到現場睇！一落機就到馬德里市中心 Plaza Mayor 看 Festival，打算第二日睇完波，之後一個早上就坐 13 個鐘早機返港，在機場梳洗就返工！男人睇波就是癲到這個程度。我問為甚麼要如此瘋狂支持？「如果你的球隊打得差，你連想睇都無機會呀。」

如果買的是套票，可以早一點到 Champions Village 內吃個自助晚餐，香檳酒水任添，8 點左右就座。安檢嚴密，只可帶細於 A4 尺寸的袋。

整個馬德里 都是足球足球足球！

老實，要用鉅細無遺神之角度睇波，就一定是睇電視直播。去現場睇波，其實重點在於現場——即是整個馬德里市。所謂的現場，不單止於睇波當晚在球場的震撼，還有歐聯在賽前於各地標設立製造氣氛的大台，以及在大街小巷流竄的狂熱。

集會、睇波，煙霧都是球迷必備，不過這款不會催淚。

歐聯現場有不少贊助品牌的檔位，有各式不同的互動遊戲，例如要玩晒足球機、波波池來贏取獎品（利申，我輸了）。

獎盃！獎盃！獎盃！

足球！足球！足球！

街邊的流動廁所頂都變成看台，你分不清他們是球迷還是歌迷，無啦啦就會起哄唱歌。

球迷穿不同的球衣，大概知道對方的「年代」，也是球迷間開場的好話題。

到了晚上贏波過後，就是勝利者全取街道。三唔識七的球迷都可以擁作一團互灌啤酒。

在 Plaza Mayor，就有臨時架設的球場，不少名宿如卡路士、費高、迪比亞路都有在此上演表現賽。

在 Sol，就有主舞台，由朝早 9 點到夜晚 11 點都有表演。

不到皇馬主場 不敢自稱球迷

歐聯不是年年都在馬德里踢（下年就在土耳其），但香港不少人都是銀河艦隊皇馬的支持者，所以睇波 + 去旅行是好合理。皇馬主場巴拿貝球場（Santiago Bernabéu Stadium）比萬達大都會球場舊很多，1947 年就落成，中間也有經過擴建，如今可容納 81,000 人。2017 年時他們與 Microsoft 合作互動的語音導航，令到本來內容好豐富的 Stadium Tour 更加滿到瀉。
一開始就可以登上西翼，拍攝球場的大全景，然後就逐間逐間房參觀，貴為贏了 12 次歐聯（前稱歐冠）的超班球隊，單是獎盃房就有 100 米長，而且不是只得乜乜珍貴照片般老套，部分大熒幕會展示不同球員的資料、鞋款、專長，好似打機！
另外，更衣室、球員通道、貴賓席都可以睇到，算是相當「闊綽」的 Stadium Tour！要走一轉的話，可以上網購票，18 歐元，不限日子（聖誕、元旦及球賽日除外）不限時間（朝 9 點半至晚 7 點）。

依照 Stadium Tour 的設計，要花上至少 1 個半小時才走得完。

後備席是 AUDI 的真皮座椅，有錢真好。

更衣室內有各球星的相片，非球迷也不會搞錯。

歐聯獎盃要特別擺放，可想而知其重要性。

紀念品店的貨色普通（皇馬口水肩……），撇除球衣印字，全白色的皇馬足球，是當中最有品味的簡約設計。

info
Santiago Bernabéu Stadium
地址：Av. de Concha Espina, 1, 28036 Madrid
開放時間：星期一至六 9:30am - 7pm、星期日 10am - 7:30pm
票價：網上預訂 18 歐元，即場購買 25 歐元，30 歐元（連語音導航）
球賽：如果想買球賽門票，可以透過官網購買，但並不容易；也可以透過部分大型平台如 StubHub、Viagogo 購買，香港也有一些旅行社搞機票酒店門票任包的睇波團
網址：realmadrid.com

到底香港人 對直播睇波有幾狂熱？ 據 Hotels.com 之前的調查所得，唔去朋友生日會（23%）、忘記紀念日（11%），唔去喪禮（2%）都好小事，但有 4% 香港球迷會放棄度蜜月！近 5% 會放棄自己的婚禮！10% 的球迷會唔入產房睇自己 BB 出世！好癲！