泰國羅勇水底執膠報告
全球 76 億人口，聽落好多，其實只佔地球物種的 0.01%。但文明的人類，你們的 0.01% 已成功摧毀全球 83% 的天然資源、生物、植物……（下刪幾多字好？）地球病重的新聞多到數唔晒，最新一則：泰國南部水域發現領航鯨，搶救後不治。死因係鯨魚肚內發現超過 80 個膠袋，重量多達 8 公斤。人類點解仲唔肯認自己好恐怖？作為其中 1 個用塑膠最多的國家，泰國發起名為「Upcycling the Oceans Thailand」活動，希望潛水人士在欣賞大自然的同時，亦去清理海中垃圾，保護海洋物種。試問誰會想看到只有珊瑚白化的海底世界？
執垃圾 海上「ON 膠游」
泰國為首個亞洲國家參加 Upcycling the Oceans 計劃，去年 9 月開始實行的「Upcycling the Oceans Thailand」活動（下稱 UTOThailand）， 聯同西班牙環保時裝品牌 ECOALF 合作，將垃圾變成「海洋的新衣」。海洋垃圾，魚網、車軚、羊毛、棉布等乜都有，最多係塑膠。最高紀錄係短短 5 小時已執到 700 公斤垃圾！唔想未來在海上膠游游，不妨參加 UTOThailand 義工，幫手清理垃圾之餘，亦為持續發展出分綿力，將垃圾變成 fashion。曼谷、蘇梅、龜島及布吉指定潛水中心都可參加。
要清理海洋垃圾，其實唔難，一身潛水裝備、一個收集袋同一本 diving passport 就得。同平時潛水一樣，慢慢、小心地欣賞海中生物，唯一不同的就是要留意埋海裏有冇垃圾，如有發現即時處理，放入收集袋中。若有垃圾同珊瑚纏埋一齊，要用刀仔將其慢慢割開，千祈唔好不顧一切地拔走垃圾，錯殺珊瑚。 
海中垃圾未算太多，只發現少量膠紙、膠袋、膠樽等。 
任務完成後，相關潛水中心會在 diving passport 蓋印，證明你在泰國某島嶼為海洋出過一分力。 
UTOThailand 計劃同行人士中，仲有位海洋生物教授 Nong 一同參加。 
專門研究珊瑚的 Nong 教授，藉着今次的清理垃圾之行，收集泰國不同水域的珊瑚來研究，為其建立一個完整的 family tree。要執垃圾、採集珊瑚樣本仲要 jot notes，好忙。 
章英傑 JASON：「出發前已睇到數據話去年執到好多垃圾，睇相睇片都覺得好誇張、好震撼。今次親身落水，發現垃圾冇想像中咁多，當然開心。身為潛水員，無論是否參加此義工計劃，平時潛水見到垃圾都有責任清理。而此計劃更可鼓勵一班潛水員或非潛水員都可以為海洋出一分力。」 
MAURIZIO：「在潛水中心工作了 6 個月，去年已參加此計劃，700 公斤垃圾中應該有啲係我幫手執㗎，哈哈。之前垃圾多到用普通收集袋根本裝唔晒，要用半個人咁高的麻包袋先裝到，但要拎返上水面就真係好辛苦，要 2 個人先拎得起。今次冇之前咁多垃圾，代表係好事，希望大家愛護海洋，有多啲國家參加此計劃。」 
「挪亞方舟」海上之旅
上文提到，在曼谷、羅勇、蘇梅、龜島及布吉的指定潛水中心可參加 UTOThailand，我們一行 9 人選擇往距離曼谷 3 小時車程的泰國東部羅勇進發！要執垃圾，建議揀 2 日船宿體驗，有牌或無牌潛水人士都可參加。有牌人士在上船前可率先在泰國灣（Gulf of Thailand）試水溫，初哥如我就需要跟住 divemaster 去泳池學基本潛水知識。黃昏時間再集合一同上船，正式開始 2 日的「挪亞方舟」之旅。
4 人房為 2 張碌架床，活動空間略嫌少了點，但住慣蝸居的港人表示已好夠住。
關於船宿，遊客最關心的大概係隻船有咩設施、瞓邊、同咩人住等問題。以今次船宿為例，義工、船員、潛水員加埋共有 30 人，活動範圍就在 3 層方舟之上。底層為客房、浴室及廚房，客房主要為 4 人間，每張床旁邊都有差電。船尾則放了大家的潛水裝備；主甲板為用餐區、船長室及 common room。Common room 有強勁冷氣，電視、DVD 機、急救用品都在此。個人最愛流連在上層甲板，半開放式空間下設有床墊，在此打躉、午睡都得。有船員更嫌客房焗促，選擇睡在甲板上。2 日海上之旅，30 人窩在船上，基本上都係食、瞓、吹水、潛水無限 loop，但一啲都唔悶，仲相當忙碌，充實同有意義過郵輪海上假期。
有牌定無牌潛水員，落船前都要簽好安全守則。 
潛水裝備在船尾，認住自己嗰 set 唔好着錯，落到水先發現唔啱身就麻煩了。 
潛水要二人一組，教練會叫你個 diving buddy 同你一前一後落水，孖公仔出發先叫安全。 
方舟除了中途要泊岸 1 次在象島作補給，其餘時間都在海上暢遊。 
教練 Khun Aoun 每次船宿都會到沉船，如回家一樣親切。
難得參加船宿，48 小時對住大海，當然要寓工作於娛樂，做義工之餘都有私心去潛水。2 日共有 7 潛，就算冇潛水牌都要潛足咁多次！皆因每位無牌 fun dive 潛水人士都有私人 divemaster 全程跟實，貼身照顧。減壓、下潛、浮力控制等知識雖然一早已在泳池學過，不過落到水底，不諳水性者如我會完全唔記得學過啲咩同非常緊張。唔緊要，盡責的 divemaster 此時發揮最大功用。你只需跟住佢落水，嘗試減壓，用口慢慢呼吸，之後的事就由佢為你效勞。
7 潛中，印象最深刻的是沉船 HTMS Chang Wreck，屬美國海軍擁有，在二戰中擔任重要角色。1962 年美軍將 HTMS Chang Wreck 贈予泰國海軍。2012 年退役後，泰國政府將 HTMS Chang Wreck 放在象島對出 30 米的海底，成為泰國最大沉船，為海洋生物提供棲息地。潛入水中，不出 10 分鐘已發現長 100 米的沉船，大量海狼（Barracuda）、黃尾鯛魚（Yellowtail Snapper）圍住船游來游去。之後更開始圍住我游走，唔怕生保的程度令我差點覺得佢哋當我是沉船的其中 1 支船桅。 
一身華麗服飾的獅子魚，暗藏毒腺，愈美麗的東西愈不可碰。 
其他潛點如 Hin Luk Bart、West Alhambra Rock、Bluebarry Hill 等亦令人大開眼界。圖為黃點玻璃蝦（Urocaridella）。 
黐晒地的多寶魚，唔細心睇好難發現。 
懾人的黃尾鯛魚魚群。 
由教練帶路，潛水員可深入沉船一探究竟。 
Divemaster 全程跟到足，導航、帶路、浮力控制等都幫你做晒。 
HTMS Chang Wreck 為泰國人民服務了 50 多年，如今則為泰國海域的海洋生物服務，成為牠們的棲息地。
INFO
2 日 2 夜 UTOThailand 船宿體驗
費用：每位 3,305 港元（包住宿、3 餐、每日 3 / 4 潛）
查詢：Rayong Dive Center
網址：www.rayongdivecenter.com
INFO
Upcycling the Oceans Thailand
網址：https://ecoalf.com/upcycling-the-oceans/thailand/
text / company man
photo / the chow、Jason Cheung @ ParadiseDiverHK、網上圖片
edit / sandy
special thanks / 泰國政府旅遊局（香港）、香港航空
currency / 文中價錢已折算成港元，THB 4.1 約兌 1 港元
