韓國江陵湖邊櫻花路情侶必去踩單車賞花！

想避開首爾賞櫻的人潮，記者近日去到江原道的江陵追櫻，不但甚少見到外國遊客，而且整個城市中櫻花隨處可見，絕對是賞櫻的好地方。但追櫻地點多多，要選最浪漫、最有氣氛的，絕對是江原道江陵的「鏡浦湖」，圍繞湖邊的櫻花路延綿 4.3km，更設單行的單車道。眼見不少情侶拖住手仔，或者踩住雙人單車，閃到忙住影相工作的記者險些連相機都拿不穩。

櫻花路分行人和單車單行道，繞著湖邊浪漫滿分。

要行完整個湖邊，最少要一個鐘，所以沿路有不少休憩長椅。

鏡浦湖位於江陵市的東北面，緊鄰東海，是由海水形式的潟湖。記者在上星期直擊一年一度的鏡浦臺櫻花祭，正值七八分開，相信去到四月中會開得更盛、更燦爛。沿著湖邊，櫻花樹密密麻麻，即使到訪當日人潮湧湧，但依然可以放腳架慢慢影，女士一定可以影到收貨才離開。想要再浪漫些，可以跟當地人在湖邊的單車店租單車遊湖，車型選擇頗多，由單人到雙人，甚至3人乘坐的家庭單車都有，最平$35可踩一個小時，無需無證金、身份證等。拉埋情人在湖邊的櫻花路踩單車，單係是這份情懷已經值得由首爾專誠過來一趟。