打風唔睇浪 睇戲最乾爽
又打風，做乜好？唉……
以下精選 6 齣電影，有動作有愛情有動畫仲有超級英雄，實有齣啱你嘅。
《打死不離 3 父女》
Why 要睇？綽號「印度劉華」嘅阿米爾汗主演，一個嚴父將兩個女訓練成摔跤選手，挑戰男尊女卑嘅印度社會，熱血感人！
《俠盜聯盟》
Why 要睇？真正劉華久休復出作品，仲有尚．連奴同舒淇。輕輕鬆鬆熱熱鬧鬧盜寶動作戲。
《心跳紐約》
Why 要睇？超經典愛情片《心跳 500 天》導演 Marc Webb 新作，一段涉及個仔同老竇嘅複雜三角戀，嘩，亂過打風。
《黑魔塔》
Why 要睇？驚慄大師 Stephen King 原著改編。原著好受歡迎，電影版明 sell 特技。故事都係主角單人匹馬對抗黑暗勢力嗰隻啦。
《蠟筆小新劇場版：外星人噼噼怪來襲！！》
Why 要睇？野原家突然嚟咗個叫「噼噼怪」嘅外星人，仲將小新老竇媽咪變做細路！小新自然要使出佢嘅甩漏方法，拯救地球。笑聲笑聲滿載溫馨。
《異人族》
Why 要睇？Marvel 最新超級英雄作品，不過唔係戲而係電視劇，又不過頭兩集用 IMAX 拍攝，所以喺 IMAX 播放！不過請注意，只喺設有 IMAX 嘅戲院播映，千祈咪去錯。
打風期間，安全至上，唔好勉強！若然天氣太惡劣，未能確保自身安全抵達戲院，咁張戲飛點算？嗱嗱嗱，不妨睇睇各大院綫嘅換票安排。
百老匯院綫：3 日內到同一戲院其他場次戲票。
UA 院綫：7 日內換領戲票代用券，有效期兩星期。
MCL 院綫：7 日內到同一間戲院觀賞同一套電影，如已落畫可選另一套。
嘉禾院綫：7 日內到同一間戲院換取相同或以下價值戲票。
星影匯：7 日內帶同戲票或購票時使用的信用卡換取相同電影之戲票。
Cinema City：7 日內到戲院換取相同價錢的戲票。
總統戲院：3 日內換取相同數量之戲票。
新寶戲院 & 豪華戲院 & 凱都戲院：7 日內換取相同數量戲票。
華懋院綫：3 日內帶同購票時使用的信用卡及取票編號，以換取相等於已購戲票數量之代用券。
（資料來源：院綫官網）