10 月野餐 x 市集 四大食買玩之選
文：Eunice 相：有關機構提供
天氣涼涼地有微風，攤係草地伸個懶腰，你晒太陽，我睇書，再食件 finger food，爽呀，呢啲咪野餐嘅樂趣囉！又不過咁，成日流流長，同朋友邊有咁多計傾，齋食有啲悶，你話有埋市集就 perfect。世事又真係有咁完美，10 月初有西九自由約、零碳天地的 Greennomarket、Pinkoi 香港好物市集，及愉景灣周日露天市集，一於野餐有時，shopping 有時。
西九夜野睇電影
野餐通常日光日白進行，日落就返歸，不過嚟緊 10 月自由約可一試夜野餐，因為苗圃公園舉行戶外電影院，放映以真實故事為背景的電影（《海報師：阮大勇的插畫藝術及《少年滋味》），醒目仔女一定識下午嚟霸靚位睇表演及日落。當日有小朋友主理「ohmykids 孩子市集」，另外「海角地攤 2046」會有不同手作人擺檔，地攤旁邊更有不同類型的音樂表演及工作坊，一家大細總有啱玩的節目。
香港文學館帶來文學野外定向，與大家一起遊走公園「尋詩」，並設草原圖書閣，讓大家投入漂書的世界，文化人亦會應邀分享閱讀及創作之樂。
「ohmykids 孩子市集」是由一眾 12 歲以下的小孩主理的小檔口，市集內有不同類型的溫暖手作售賣。 
客席音樂策劃馮穎琪帶來黎曉陽、黃劍文、Trekkerz、Nowhere Boys 及游學修等創作人以音樂作嚮導。
10 月 8 日晚上將播放《海報師：阮大勇的插畫藝術》，10 月 9 日晚上播出《少年滋味》。
【西九自由約】
日期：10 月 8 日及 9 日
時間：2pm - 10:30pm
地點：西九文化區苗圃公園
【ohmykids 孩子市集】
日期：10 月 8 日
時間：2pm - 6pm
Greennomarket 即場玩
九龍區的朋友，如果野餐去佐敦谷公園去到厭，啟德郵輪碼頭又嫌遠咗少少，有冇考慮過零碳天地？就係 Megabox 商場對面個大片草地，其實大家可 feel free 唔使客氣去野餐架，有咩要補給，行去對面商場好方便，認真唔錯！10 月 2 日零碳天地舉行 Greennomarket，有綠色市集、音樂表演及創意工作坊，如港嘢 x Greennomarket：香港好嘢！本地農產之草地野餐 + 故事分享、零碳天地室內展區參觀導賞團、夏威夷小結他工作坊等，節目豐富。
【港嘢 x Greennomarket：香港好嘢！】
本地農產之草地野餐＋故事分享
名額 15 人
費用：$20 位
報名方式：http://goo.gl/oU6f9O
【Greennomarket】
日期：10 月 2 日
時間：12nn - 6pm
地點：九龍灣常悅道 8 號 建造業議會零碳天地（Megabox 商場對面）
註︰港嘢 x Greennomarket：香港好嘢！本地農產之草地野餐 + 故事分享、零碳天地室內展區參觀導賞團需網上報名，其他工作坊可即場報名。
facebook：www.facebook.com/greennomarket
Pinkoi 香港好物市集
同樣是零碳天地，10 月 8 日及 9 日有 Pinkoi 香港好物市集，今次陣容強呀，有 127 個來自香港、澳門、台灣、中國、泰國、日本、新加坡、馬來西亞八地的創作品牌，共 85 個攤位，手作食品、童裝、家居用品、服飾、寵物用品、手工皮具等，真係有排 shop。不過咁，可能到時人太多，未必有位草地野餐，堅決要野餐的朋友，可博一博 7am 入場公眾休憩綠化區，晨早野餐！
台灣「海邊 走走」花生愛餡蛋捲 $121
泰國 oysterfootwear 白色流蘇皮革涼鞋 $609
新加坡 Ohpopdog 藍灰拼布波點 Tee $183
馬來西亞母の夢藍色花布上衣 $279
【Pinkoi 香港好物市集】
日期︰10 月 8 日及 9 日
時間︰11am - 6pm
地點︰九龍灣常悅道 8 號 建造業議會零碳天地
FACEBOOK: https://www.facebook.com/pinkoihk
愉景灣沙灘野餐
野餐唔一定要去草地嘅，沙灘一樣好 feel，海風 directly 吹送，正！唔想自備食物搭船入去咁麻煩，即興去便行店及超市買，甚至餐廳 order take away fish and chips、pizza，再買冰涷汽水啤酒就搞掂，成件事係咪好 chill 先，小朋友更可以去沙灘嬉水或遊樂場玩滑梯放電。講番愉景灣周日露天市集，係行幾步路就到舉行嘅愉景廣場，過百檔手飾、服飾、手工藝、環保文具，以至有機產品等，大把選擇。
【愉景灣周日露天市集】
地點︰愉景灣愉景廣場
日期︰10 月 9 日、11 月 13 日、11 月 27 日、12 月 11 日
時間︰11am - 6pm
網址：www.ddeck.com.hk
