入場睇《軍艦島》前 7 項需知
上年最勁韓片自然係《屍殺列車》，今年，好有可能係《軍艦島》！無論你以乜嘢理由入場觀看（睇怕都係因為宋仲基啦），不妨先睇以下 7 項需知，隨時會令你睇得更投入！
1.宋仲基的使命！
在電影裏誓要營救全部朝鮮人逃出軍艦島的宋仲基，早在拍《太陽的後裔》時已經睇緊《軍艦島》劇本，愈睇愈感動！「電影描述我們上幾代人經歷的苦難，我們希望透過電影刻劃他們的痛苦。」好大使命感，不過搞到污糟邋遢兼爛身爛勢，一班宋太太難免心痛。
2.實力派男星 x 2
另外兩位實力派男主角分別是黃晸玟和蘇志燮。前者飾演一個樂團領班，以為去軍艦島可以搵大錢……點知上咗賊船——應該係賊島先啱。至於剛強的蘇志燮，主張用拳頭解決所有事，是軍艦島上一班朝鮮人的大佬，最後為救同胞更挺身而出，感動！
3.「孔劉女兒」金秀晏
不得不提金秀晏。呢位童星上年在《屍殺列車》以「孔劉女兒」一角深入民心，今次則扮演「黃晸玟女兒」，同樣命途多舛，上次遇喪屍，今次就遇上日本軍人……
4.點解講逃亡？
一定要介紹埋導演柳昇完。曾拍攝《柏林諜變》的他，因為睇見軍艦島照片，有感呢個巨型人工島簡直好似一座與世隔絕的監獄，立即構思咗一個逃亡故事，而且聯結埋朝鮮日治時期的歷史。
5.歷史真實但故事虛構
要注意的是，雖然話連結歷史，但《軍艦島》故事純屬創作，歷史上從來沒有發生過 400 名朝鮮人集體逃亡的事件。柳昇完只想透過故事，讓新一代了解韓國歷史中的一個苦痛時期。
6.揼本精製軍艦島
作為電影主要舞台的軍艦島，則是劇組在南韓春川搭建——即使只是布景，製作上卻超級認真和極度揼本，除了著名的超高密度石屎建築物，就連島外圍用嚟運煤炭嘅輸送帶以及那條惡名昭彰的「地獄梯」，全部整晒出嚟！
7.破《屍殺列車》紀錄
上月 26 日電影在南韓開畫，上映首日票房已經收 61 億韓圜，入場人次高達 970,918，破咗舊年《屍殺殺車》首日 87 萬入場人次的紀錄！係勁嘅。