1. 雙重口感 札幌名物布丁燒@Kidulteam Limited (展位編號：3B-F03，尊貴美食區)

由自家製焦糖漿、雞蛋布丁同乳酪輕芝士蛋糕組成嘅呢件札幌名物布丁燒在香港好少見，估唔到賣開卡通甜點嘅山下菓子剛剛都推出了，在美食博覽都食到！可一次食齊滑溜布甸同輕盈的芝士蛋糕兩種質感，唔只有原味同抹茶味兩款選擇，最吸引嘅係到時實物仲會印上Sanrio卡通圖案，每日限量400杯，粉絲必搶！

卡通布丁燒 (原味/抹茶味) $35

2. 超萌手工雪條@ Kidulteam Limited (展位編號：3B-F03，尊貴美食區)

呢兩條乳酪雪條造型好Cute啊！分別加入了時令嘅白桃汁或士多啤梨汁製作，果味天然，解暑不過甜，用來打卡呃like都一流！

屎屎造型/粉紅兔兔造型乳酪手工雪條 $48/條，$80/ 2條，買5送1

3. 當意式黑松露醬遇上長洲大魚蛋@ 義生洋行  (展位編號：3B-C09，尊貴美食區)

平民本土嘅長洲大魚蛋今次同矜貴嘅意大利黑松露醬crossover，再分別加埋Raclette熱溶芝士/忌廉醬或韓式辣醬，估唔到味道都幾夾！黑松露醬出手闊綽，足有一湯匙，配上彈牙魚味香嘅大魚蛋，好正！

意大利黑松露醬x長洲大魚蛋 $20/2粒

每日頭20名客人，仲可以$1買到呢樽90克嘅意大利黑松露醬一樽，好筍！

4.  激筍$0.5歎花膠@味高美有限公司 (展位編號：3B-D23、3E-E09，尊貴美食區、公眾館)

你無聽錯！只要成為每日首10個客人，就可以$0.5歎到原隻涼拌花膠！份量一d都唔欺場，係三十幾頭嘅鱸魚花膠，用雞湯浸過夜、攤凍，食時再灑點蒜、芝麻、蘋果醋等，食落膠質重，幾入味！遲了到場都有機會食到，$40有一份，正價食價錢都可接受。

涼拌花膠 $0.5 (只限每日首10位客人)

5. 抵食香噴噴黑松露炒蛋@味高美有限公司 (展位編號：3B-D23、3E-E09，尊貴美食區、公眾館)

除了$0.5歎到原隻涼拌花膠，呢個攤位仲有另一樣筍野：就係每日頭30個客人可歎到即炒黑松露炒蛋！炒蛋滑溜，黑松露醬落得夠多，香氣超誘人，抵食到震！

黑松露炒蛋 $0.5 (只限每日首30位客人)

6.平食西班牙火腿@ Diverxu Limited (展位編號：3B-D07，尊貴美食區)

美食博覽試飲/買了不少平酒想搵d下酒物送送酒？推介你點呢碟16個月的西班牙白毛豬火腿！只需$10就有一小碟，味道鹹香，油香十足，買來過過口癮一流！

白毛豬火腿 $10/碟

7. 真．鮑魚撈麵@安記海味有限公司 (展位編號：1C-B10，公眾館)

呢份$48嘅鮑魚撈麵唔係淨係得鮑魚同鮑汁，係真係有2隻鮑魚喺度！用嘅係品牌嘅即食紅燒鮑魚，每隻都有約乒乓球size咁大，煮得夠腍夠入味，好味！汁底都有來頭，話說今次安記同鼎爺crossover，用來撈鮑魚麵的汁由鼎爺秘製，鮮味十足。

鮑魚撈麵　$48

來這攤位除了食鮑魚撈麵，首日頭十位顧客都可以$1玩福袋遊戲，顧客會分成兩隊，隔住3米高的巨型福袋拋小福袋，限時內接到的福袋數量均可兌換成同等數量嘅福袋，內有鮑魚、花菇等6款食品，每袋價值$480！

8. 足料擔仔麵 @ 廚家班程班長飲食集團股份有限公司 (展位編號：1B-A28，公眾館)

牛肉麵賣到街知巷聞嘅程班長今年除咗牛肉麵，仲特登喺台灣運咗個由竹藝老師傅度身訂造嘅肩挑擔嚟，賣埋另一款台灣美食-擔仔麵！即席製作，麵條吸滿上湯，肉燥香惹，蝦鮮甜彈牙，仲有肉丸同滷蛋，好豐富！

擔仔麵 $38

9. 潮食Shake Shake大蝦片 @冠華食品菓子廠有限公司 (展位編號：1C-B33，公眾館)

在冠華呢個咁Old School嘅檔攤發現呢架「爆谷車」！裝嘅唔係爆谷而係蝦片！買蝦片仲會附送埋一包shake shake粉，有四川麻辣、美式BBQ、泰式咖喱等6款口味，倒入微暖嘅蝦片度shake來吃，惹味度double up！

Shake Shake蝦片 $10/包

10. 首創羅漢果糖雪糕@香港源田實業有限公司 (展位編號：3E-D18、3B-E22，公眾館、尊貴美食區)

呢款雪糕係本地薑雪糕店Lab Made同主打羅漢果糖嘅Tim Sweet Crossover 嘅雪糕，雪糕以由羅漢果提煉而成嘅糖代替普通糖做雪糕，味道清甜，比一般雪糕低糖健康，食得更安心。

羅漢果糖雪糕 $35

第28屆美食博覽

日期： 2017年8月17日 –8月21日 （公眾館）；8月17日至8月20日（尊貴美食區）

時間：10am-10pm (8月17日至20日，公眾館及尊貴美食區)；10am-6pm (8月21日，公眾館)

地點： 灣仔博覽道1號香港會議展覽中心

票價：1. 「美食博覽公眾館」、「美食博覽尊貴美食區」、「家電．家品．博覽」及「美與健生活博覽」門票 $40/張；「美食博覽公眾館」、「家電‧家品‧博覽」及「美與健生活博覽」門票 $25/張；「美食博覽公眾館」、「家電‧家品‧博覽」及「美與健生活博覽」晚間進場票 $10/張 (另可追加票價$15參觀即晚的「尊貴美食區」)