精選Tom Cruise 代表作！
係，Tom Cruise 好鬼鍾意展示 fit 爆體能，可能係史上最少用替身的巨星。不過佢唔只想做動作演員，仲演過不同戲種。
《壯志凌雲》
24 歲響朵作。戰鬥機機師 Maverick，本來意氣風發，唔多跟規矩的「危險人物」，到摯友身故意志消沉，好彩臨尾戰勝心魔奮起飛過！當年的 Ray ban 眼鏡、皮褸造型人人跟風。好消息：靚佬湯 30 年後宣布續集真的開拍了。
《甜心先生》
天之驕子 Tom Cruise 鮮有演 loser——仲要係由本來成功到爆的運動員經理人，因為良知醒覺而冇得撈的 loser。好在坎坷過後有艇搭，佢遇上單親媽媽同低潮運動員，一齊過渡。而且勵志後有浪漫，一句「You complete me」，冧冧豬。
《職業特工隊》系列
Ethan Hunt，動作乾淨俐落又夠大膽，成功創造有別於 007 的另一特工原形。首集動作簡約、驚艷；吳宇森拍過第二集。去到第四集《鬼影約章》，只見 Tom 人到中年愈來愈唔錫身，爬哈利法塔成癲狂新典範，是整個系列與他本人回勇作。
《大開眼戒》
大師 Stanley Kubrick 遺作，也是 Tom 與妮歌潔曼婚姻之遺作。當時仍是夫妻的二人演（看似激烈的）親熱戲，是一大 talking point，查實大師透過名流夫妻性遊戲，仍在探究社會結構與情慾追求，冇乜嘢睇的。
《人生交叉剔》
在角色、劇情紛紜的《人生交叉剔》，Tom Cruise 首次脫離小生靚仔模式，被確認為搶到戲的演員。他的角色似「傳銷」，推廣雄性力量，而他本人是與父仳離，終生不想再見老竇的人。戲分少但有份提名奧斯卡男配角。
《未來報告》
個 concept 幾正：未來有個犯罪預防局，預視系統能偵察即將發生的罪案，再防患於未然，以達致零犯罪率。Tom 係撲滅罪行之星，但隱隱然覺得唔妥，而人一自省，就招惹麻煩！靚佬湯掃芒的動作，現在看來算前衛，Iron Man 都係咁之嘛。