媽咪專用！　10 句囉唆窩心金句～

《童年篇》

當你過年收到利是，媽咪總係話：「阿媽幫你保管住先。」

其實係幫你儲埋，費事你亂使。

當你猛咁食糖時，媽咪總係話：「仲食？一陣成棚蛀牙吖！」

其實唔係唔畀你食，只係唔想你成棚爛牙攞苦嚟辛啫。

當你太曳時，媽咪總係話：「生嚿叉燒好過生你！」

其實只係當你激到媽咪太嬲時的晦氣說話，媽咪都好痛心。

《青春期篇》

當你夜晚洗完頭又唔吹返乾時，媽咪總係話：「話咗你唔好咁夜洗頭，第日老咗你就知！」

其實都係擔心你頭痛啫。

當有男仔打電話嚟屋企搵你而又由媽咪接電話時，媽咪總係話：「男仔聲嘅！做乜晚晚打嚟！」

其實都係驚你太細個拍拖荒廢學業啫。

當你夜瞓時，媽咪總係話：「夜晚唔願瞓第二朝又唔願起！」

其實媽咪都係驚你成日夜瞓唔健康啫（如無意外，呢句說話講到你返工都仲繼續講）。

《成年篇》

當你開完夜或者玩完返到屋企，媽咪總係未瞓而且話：「我滾番熱啲湯你飲！」

其實媽咪都係想成日喺街食味精嘅你，多啖住家湯水啫。

當你單身時，媽咪有時會忍唔住話：「真係冇合眼緣嘅咩？」

今時今日，單身當然冇問題，但媽咪咁講，無非都係擔心你啫。

當你結婚後，媽咪有一日話：「你生完，阿媽都可以幫你湊㗎。」

不排除媽咪真係好想抱孫，但其實都係想你知道佢點都會撑你啫。

當你已經有咗自己家庭，唔係成日返屋企，有一日收到媽咪WhatsApp：「幾時返嚟陪媽咪食飯吖？」

衰仔衰女，你幾耐未見過媽咪呀？