Girl Power崛起！電影、電視劇三大私心推介！
Netflix 新劇《Girlboss 女波士》上星期開播，由Sophia Amoruso 真人真事改編。23 歲囡，畀人炒、窮到要喺垃圾筒執麵包……夠衰喇啩。點知佢憑天生時尚觸覺，將9 蚊美金買入嘅古着賣到600 蚊，之後仲逐步建立市值百萬計的時裝品牌 Nasty Gal，係咪又堅揪又熱血先？
其實近年喺電影同電視劇界都見到Girl Power崛起，小編就有以下私心推介，都係改編堅揪女子真人真事，睇吓人哋點樣從慘豬遭遇中站起來！
《少女香奈兒》（2009）
Coco Chanel 孤兒院長大、做過歌女、感情受傷……唔只一次。在男人話事的保守年代，她以上流社會不能拒絕的型格靚衫，特立獨行又開創時尚。雖然電影比較重視她的感情生活。
《歡姐當自強》（2015）
Jennifer Lawrence 演的 Joy Mangano 都好鬼慘：單親媽媽，屋企雞犬不寧，千辛萬苦發明咗「神奇地拖」，冇人幫佢賣，搞到自己上電視 sell 貨，又畀佢搞掂！點掂？賣到數以百萬計把地拖呀。
《王冠》（2016）
佢唔只係一間公司的女波士，仲係一國之女波士，講緊啱啱 91 歲生日的英女皇。父王佐治六世駕崩時，伊利沙伯二世年僅 25 歲，未學識做君主，就要登基，從此不可說錯一句話、不可行錯一步路。