超人氣手工芋圓 來來小吃店

嚟到太安樓唔食芋圓，唔稱得上真正掃盡太安樓！不過要食到呢間主打台式冰品的甜品店，最出名的是每日新鮮即製的手工芋圓。芋圓每日用新鮮芋頭搗成蓉，加地瓜粉手搓而成。仲有地瓜圓及紫薯圓，全部都是用新鮮食材製作！芋圓食到粒粒芋頭，口感有嚼勁又軟綿。配以地瓜、珍珠、紅豆、手工愛玉等，$35大大碗，抵！

五種冰 $40

黑糖刨冰底之外，再於手工芋圓、紅豆、手工愛玉、黑糖寒天、仙草凍等自選 5 款配料。

芋圓大大粒，口感煙韌，配冰凍的刨冰，食完成個人涼浸浸。

【Info】

來來小吃店

地址：西灣河筲箕灣道57-87號太安樓第二街A33B號鋪

$28海南雞飯 海南雞專門店

呢間獨沽一味只賣海南雞飯的小店，日日都排晒長龍。吸引到咁多人排隊都要食，因為真心平！一碗海南雞飯只是 $28！去骨的雞件，肉味唔突出，但勝在肉質嫩滑、皮爽彈。老闆用了絲苗米飯以雞湯及香料煮，香氣撲鼻。撈埋黑豉油、自家製的薑蓉及辣椒汁，份外香心惹味！難怪成為人氣排隊店！

海南雞飯 $28

去骨雞件嫩滑多汁！

【Info】

海南雞專門店

地址：西灣河太安樓地下A32B舖

電話：6539 9312

營業時間：11am- 9pm（售完即止）

酥脆鬆化雞蛋仔 鴻記雞蛋仔

一底雞蛋仔，簡單無花巧的，就以雞蛋、麵粉和砂糖mix成的蛋漿製成。點解平平無奇的雞蛋仔，會賣到上國際網站CNN GO？更被評為香港最美味雞蛋仔之一？呢底雞蛋仔源自老闆賴釗鴻的爸爸，於50年代街邊擺車仔檔的食譜。他花了足足 8 年時間鑽研雞蛋仔配方。麵粉常挑細選，雞蛋要用蛋味濃的東北蛋溝其他雞蛋使用，又加了脆漿使雞蛋仔更脆口。仲要每日睇天做人，根據濕度及溫度調節分量。烘雞蛋仔時以慢火焗，保證雞蛋仔中間全熟、外表脆卜卜又不過燶。

蛋漿落得多，再以慢火焗熟。外面脆口，每粒雞蛋仔的色澤均勻一致。

雞蛋仔唔係得個殼！中間唔係空心，質地軟綿似蛋糕仔。

【Info】

鴻記雞蛋仔

營業時間：下午3:00 至午夜1:00

地址：西灣河筲箕灣道57-58號太安樓商場A34C號鋪

勁入味柚皮 太安樓牛雜

牛雜款款都咁入味，完全無內藏的古怪異味。睇吓個餐牌，牛肚、牛膀、牛筋、蝴蝶腩、牛心腚、豬腸、豬肺，就連工夫多多的柚皮都有，真係乜都有得食！淨食每款 $6，配麵 $18。乜都想試的話，梗係食雜綿啦，最細都是$30，但款式樣樣齊！

牛雜的香味隔幾個舖位都聞到！

雜 $30/細、 $40/中、 $50/大

柚皮

因為工夫煩繁複，所以而家好少地方食到柚皮。小店的柚皮軟腍無渣，完全無苦澀味，好食！

【Info】

太安樓牛雜

地址：西灣河筲箕灣道57-58號太安樓商場A31B號舖

營業時間: 10am – 11pm

娥姐粉果燒賣

嚟到娥姐除咗食自家製粉果，仲要試腸粉。娥姐的腸粉唔同平時見慣見熟的圓碌碌、條狀的腸粉。老闆收一柯打就將自家製的米粉漿倒入蒸櫃內，再灑上葱花及打入雞蛋。伴以豉油撈埋食，米香又有雞蛋香。

雞蛋腸粉 $23

【Info】

娥姐粉果燒賣

地址：西灣河筲箕灣道57-58號太安樓商場A9-2A號舖

惹味沙嗲汁 魚蛋佬

呢間小食店真係好易走漏眼！小記本來只是企喺小店食嘢，點知見到魚蛋佬愈來愈多人買嘢食，無理由唔試啦！魚旦 $6一串5粒，魚旦唔彈牙無特別，但小食的靈魂在於沙嗲汁！味道不太辣而且帶點甜味，沙茶味突出，醬汁重種包圍每粒魚旦，好惹味。小店亦有牛百葉、齋、魷魚及牛丸等，好想用沙嗲汁撈公仔麵食！

魚旦 $6

一串5粒的魚星旦並不是特別爽口彈牙，但沙嗲汁卻很出色。

【Info】

魚蛋佬

地址：西灣河筲箕灣道57-58號太安樓商場A28號B

營業時間：12nn - 9pm

地道台式手抓餅 +5ºC 手抓餅專門店

太安樓除咗要掃盡港式小食之外，呢度仲有好多台灣小食！+5ºC 手抓餅專門店的老闆，於開店前專程到台灣學整手抓餅，餅底跟足當地配方，每日新鮮製作。餅底無花巧，只得原味一款選擇，全部即叫即製。餅底 $16，另有芝士、雞蛋、肉鬆、肥牛等 20 多款配料任揀，配料由$5-$9不等。

手抓餅 $15（配料 $5-$9）

即製的手抓餅捧上手熱辣辣，手抓餅酥脆香口帶點煙韌。配沙律醬，酸酸甜甜好惹味。想食辣可以加啲用指天椒製成的辣粉，辛辣刺激！

【Info】

+5ºC 手抓餅專門店

地址：西灣河筲箕灣道57-58號太安樓商場A34號B

營業時間：12nn - 9pm

Q彈珍珠 今日真珠茶專賣店

台灣美食又點少得珍珠奶茶？小店人氣勁過對面馬路的連鎖台式飲品店，負責人話小店的珍珠奶茶用咗台灣紅茶茶葉沖泡，茶味香濃。加埋奶之後，奶茶入口幼滑。最驚喜是充滿黑糖味的珍珠，煙韌Q彈，好有咬口。

珍珠奶茶 $16

【Info】

今日真珠茶專賣店 （Today）

地址：西灣河筲箕灣道57-58號太安樓A54號B舖