日式鐵板燒 大黑魔燒

無行葵廣一排，發現小食店又大執位！上年 12 月開嘅五代同糖，變咗做日式鐵板燒，唔賣雞蛋布甸轉賣和牛粒。食物全部即席放鐵板燒，行過都聞到陣香味呀！

大黑魔蟹皇 $45

點解唔賣甜品呀？老闆話之前賣嘅甜品及炸物，跟其他鋪賣的小食相似。於是轉型做日式串燒店，殺出條新血路。葵廣有即席整嘅鐵板燒啵，咪話唔吸引！更吸引係竟然有和牛食！招牌「大黑牛魔皇 」有 5 粒鹿兒島一口和牛粒，放鐵板煎香。配吸有和牛油脂嘅多士及一球Häagen-Dazs 雪糕，葵廣頂級享受！

大黑魔蟹盛 $43

原個蟹蓋釀入混有蟹肉、蟹膏、明太子嘅薯蓉，鋪滿加蟹籽及沙律醬再用火槍燒。薯蓉軟滑、富有蟹膏香。仲用蟹箝及蟹柳方蟹蓋旁邊，砌返蟹型出嚟！

黃金芝士燒廣島蠔 $28

炒雜菜上放鐵板燒過嘅廣島蠔，加蛋黃醬、Mozzarella 及車打芝再燒。

（右）鹽燒牛舌 $13、（左）照燒五花腩 $13

即叫即燒串燒，牛舌先煮2小時再燒，夠腍又有牛脂香！五花腩經燒後，油脂迫出，配燒汁勁惹味。

皇帝蟹極上豚肉卷配日式燒汁炒麵 $32

即席於鐵板炒麵，麵條不太油膩。皇帝蟹極上豚肉卷，用了豚肉片將皇帝蟹柳捲起。

【Info】

大黑魔燒

地址：葵涌廣場3樓 TOP 世界 3069-T16-17 號舖

營業時間：11am-10pm

明洞五花腩卷 韓嘢

「韓嘢」呢個名好熟啵！係，小店之前坐落一樓，於兩個月前搬上 2 樓大啲嘅鋪位。除咗有主打啲韓國明洞街頭小食五花腩卷外，仲加入咗幾款串燒。

芝士泡菜五花腩卷 $28

呢個係老闆呀傑於韓國明洞帶返嚟香港嘅小食。五花腩片入面，捲有椰菜、甘筍、年糕餡。呀傑將椰菜切成大片，食落更爽脆。卷內嘅泡菜都係自家醃製，味道酸咪咪、唔太辣。

特長燒汁五花腩串 $15

新推小食！原條五花腩用梨蓉醃過，肉質軟腍。掃上燒汁再用女槍燒香，大大條，長過部iPhone！

芝士燒茄子 $20

茄子開邊後抹上燒汁及鋪滿芝士茄子，好惹味！

【Info】

韓嘢

地址：葵涌廣場 2 樓 C07A 號鋪

營業時間：12nn-10:30pm

流心玉子燒 大滿足

黑松露流心芝士玉子燒 $35

位於 2 樓嘅大滿足，專賣日式手卷！最近開咗個鋪位賣日式玉子燒，10 款玉子燒內最吸引嘅係「黑松露流心芝士玉子燒」，玉子卷有大量黑松露醬、芝士及粟米粒。

【Info】

大滿足

地址：葵涌廣場 2 樓 2009 鋪

營業時間：11:30pm-10:30pm

電話：3188 3788

抹茶奶蓋 Color ChaCha

抹茶奶蓋配烏龍茶 $23

台式飲品店有新出品，平時飲開嘅奶蓋加咗抹茶味！抹茶奶蓋質地好厚身，入口好滑！抹茶味好突出，配烏龍茶底唔會搶走茶味，好夾！

【Info】

Color ChaCha

地址：葵涌廣場 2 樓 3 號鋪

營業時間：12nn-11pm