窮人恩物 $28 任食雞煲！
你無睇錯，我無寫錯，呢個世界真係有$28任食雞煲。餐廳無將貨就價，選用肉地厚身嘅三黃雞，每個雞煲即叫即炒。嘩！呢個雞煲簡直係窮人恩物！
Text ：Jessie
Photo：Brian
邊個老闆咁痴線，搞 $28 任食雞煲？咪就係「農場火鍋專門店」，之前餐廳都推出過$58 任食羊腩煲、$68 任食盆菜，今次再筍啲，$28就可以於一小時內任食雞煲！
$28 任食 60分鐘農場秘製雞煲放題（4-6人分量）
雞煲放題每日 5pm 開始，限時 60 分鐘，$28 任食優惠每日限額200位，黃大仙店及土瓜灣店每店各100位，需要預先訂位先有得食！雞煲可以選擇原味或麻辣，份量按人頭計算，2-3 人有半隻雞、4-6 人就有隻雞，7人以上會提供兩煲。餐廳用咗三黃雞製作雞煲，每隻雞重約 2-3 斤，份量十足！有柯打時，大廚即時炒煮雞煲。
先爆香四川辣椒仔、香葉、八角、乾辣椒 、辣椒籽及中國南薑片。再放雞件及辣醬爆炒拌勻後，放於墊有蘿蔔嘅煲內。最後用花椒油將新鮮花椒略炸，再淋於雞件上。
三黃雞肉厚嫩滑，雞肉有鮮甜味，食啖啖啖肉，正！中辣雞煲味道帶甜，辣度適中，如果麻香重啲就更好！
雞煲底嘅蘿蔔清甜無渣，盡吸雞煲麻辣香味！
$28 任食當然可以追加雞件，每次追加嘅份量都有約 15 件雞。提提你，呢個價嘅任食唔包飲品及其他火鍋配料，想食要畀錢追加喇！幫你埋單計數，$28 任食雞煲另收每位 $10 醬油費及10%服務費，即係每位 $42。星期五至日、公眾假期及其前夕另收附加費每位$20！
【Info】
農場火鍋專門店
地址：黃大仙飛鳳街46號地舖
電話：5931 244（whatsapp）/ 3748 9413
註：只接受現金