4大必食龍蝦包　CP值大比拼！

自從日本帶起一股龍蝦包熱潮後，香港突然湧現唔少龍蝦包食店，但大多數的品質與價錢唔成正比，所以今次搵嚟 4 間人氣龍蝦包店，從賣相、龍蝦肉多寡新鮮度、醬汁、麵包及價錢來個比拼，睇吓邊間性價比最高，唔駛大家白花冤枉錢。

文：Theo

攝：Brian

性價高嘅龍蝦包應該係……

賣相：夠吸引又要夠大件，睇到已經有想食嘅衝動。

龍蝦：肉質要新鮮兼彈牙，份量當然愈多愈好啦！

醬汁：最緊要能帶出龍蝦本身的鮮味。

麵包：軟硬度要適中，最好係外層香脆內裏鬆軟，索晒龍蝦肉汁。

價錢：當然係愈平愈好，抵食夾大件，性價比先夠高。

食出龍蝦鮮味─Lobster Central

Lobster Roll $138

未食已經畀兩隻引龍蝦鉗肉吸引，加上有成16.5cm長，夠搶眼。龍蝦首先在波士頓經海水煮熟再冷藏原隻打包運抵香港，肉質保証新鮮，食落都算彈牙有淡淡海水鹹味，醬汁只是輕輕用蛋黃醬、檸檬、西芹鹽及牛油調味，食得出龍蝦本身味道，唔太heavy，如果鍾意食濃味者，可能會覺得太單調。至於麵包選用美式熱狗包，烘得夠脆身，牛油味不會太搶。

(5分最高)

評分

賣相：***

龍蝦：***

醬汁：**

麵包：***

價錢：**

總分：14分

龍蝦包長16.5cm，四間之中最長。

【INFO】

地址：中環士丹利街50號地下E號舖

電話：3565 6725

營業時間：11am-8pm

賣相最吸引─Rise

Lobster Roll $98(半個) $168(全個)

位於人頭湧湧的灣仔築地．山貴水產市場，有間由黃婉曼負責經營龍蝦包店「Rise」。主打的龍蝦包賣相好吸引，尤其是睇落啖啖內的龍蝦鉗，除咗有主角龍蝦外，仲夾有新鮮蔬菜，麵包選用自家製的法包，睇落好吸引。至於主角龍蝦方面，雖然數量不多，只有四五件，但份量夠大，啖啖肉，夠過癮，加上醬汁調配非常豐富，有BB蛋黃醬、檸檬汁、蒜粉、番茜及黑椒，食落夠惹味。由賣相到味道，最平均。

評分

賣相：****

龍蝦：***

醬汁：***

麵包：***

價錢：**

總分：15分

【INFO】

地址：灣仔灣仔碼頭2樓

營業時間：星期一至日12nn-10：30pm

電話：從缺

鮮味龍蝦大爆發─Hungry Lobster

Lobster Roll  $138

近年銅鑼灣的登龍街成為餐飲業的人戰場，短短一條街已經有多間人氣食店，連龍蝦包店都有兩間之多，確實誇張。不過位於街尾的Hungry Lobster就成為龍蝦控的最愛，原隻新鮮波士頓龍蝦每日直送，經由大廚親以英式烹調手法處理，醬汁以煮到啡黃色的牛油、檸檬汁及龍蝦濃縮汁調配，加上肉質相當新鮮及淡淡海水味，龍蝦鮮味在口腔大爆發，還會附上醬汁畀你自己添加。至於麵包方面，用上牛油甜包，塗上牛油烤焗，外層算幾香脆，但食落有點糊口，兼有點油膩。

每客龍蝦包附送的龍蝦汁，入口有淡淡龍蝦鮮味及牛油香。

龍蝦有成87g，擠滿整個包。

評分

賣相：***

龍蝦：****1/2

醬汁：****

麵包：**1/2

價錢：***

總分：17

【INFO】

地址：銅鑼灣登龍街18號V Point地下3號舖

電話：9330 5378

營業時間：星期一至日 11:30am-10:30pm

傳統風味—D.H.Crab

Lobster Roll  $98

講到Lobster Roll，已經有近年百歷史，最早在以海產聞名的美國緬因州的老牌餐廳研發。位於鰂魚涌海光街的小店D.H.Crab就食到最正宗的味道，因為外籍店主曾經當過漁船大廚，店內掛上他不少出海的照片，選用緬因州出產龍蝦，以傳統烹調手法，檸檬汁及香草調味，肉質爽口彈牙，香草味極重，而麵包都是簡單塗上牛油烘焗的甜包，唔駛一百蚊食到正宗龍蝦包，都算抵。

評分

賣相：**

龍蝦：***

醬汁：***

麵包：**

價錢：****

總分：14

【INFO】

地址：鰂魚涌海光街5號地下C舖

電話：2555 1885

營業時間：星期一至日 11:30am-9pm

總評：

今次 battle 的 Lobster Roll 之王，是銅鑼灣的Hungry Lobster！

原隻新鮮波士頓龍蝦每日直送，配以以英式烹調手法處理，令本身已經相當新鮮的龍蝦肉，更添鮮甜味！食落仲要有陣陣的海水味，龍蝦迷真係不能不試！