最新朝聖指南 4 大人氣梳乎厘班戟

甜品界當紅大熱的梳乎厘班戟，憑佢拎上手震騰騰、按落去軟綿綿、食入口勁有空氣感，迅速俘虜一眾少女心（定係胃？）！最近唔少甜品店及 cafe 都推出梳乎厘班戟，價錢仲要好親民，最平就食到！好抵呀，留肚食甜品啦！

Text: Jessie

Aroma Dessert Cafe 鬆軟中帶實在感

荃灣區係搵食勝地，於鱟地坊新開的甜品店 Aroma Dessert Cafe 有士多啤梨、焦糖蘋果、芒果、白桃 4 款口味的日式厚班戟選擇，各配不同醬汁，士多啤梨配藍莓醬、芒果配熱情果醬、焦糖蘋果配楓糖漿。厚班戟配上水果，加多球呍呢嗱雪糕，賣相靚靚，完全符合相機食先的要求。班戟唔係得個樣，店主 Ryan 到日本幾間出名賣梳乎厘班戟的店舖取經。他於基本材料蛋白及砂糖內，加入奶、忌廉、麵粉等，調配成自家風味，食落的質感不是日式的入口即溶，好似吞了陣風落肚咁，而是鬆軟中帶實在感。班戟是即叫即製，每日只限量供應 100 份。

芒果厚 Pancake 伴熱情果醬 $65

班戟質感鬆軟中帶實在感，放面的是呂宋芒夠香甜。淋上熱情果醬，味道很夾。呍呢嗱雪糕混有粒粒呍呢嗱籽，又有北海道牛奶的香，食完很滿足。

焦糖蘋果厚 Pancake 伴楓糖漿 $65

將青蘋果切粒以砂糖炒成的焦糖蘋果，味道甘香，以楓糖漿伴食，非常對味的配搭。

士多啤梨厚 Pancake 伴粒粒藍莓醬 $65

士多啤梨和藍莓配 Pancake，綴以士多啤梨醬，顏色鮮艷奪目，再蘸藍莓醬來食，又香又甜又好吃。

山形縣白桃厚 Pancake 伴純乳酪 $65

採用爽甜的日本山形縣白桃，配上純乳酪，食落清新健康。

【Info】

Aroma Dessert Cafe

地址：荃灣鱟地坊 38-46 號祐強樓地下 42 號舖

電話：6433 7787

營業時間：星期二至日 3pm-11pm（逢星期一休息）

I Love You Dessert Bar $29 超鬆軟梳乎厘班戟

$29？冇睇錯！的確咁平，唔好以為質素平平無奇，相反非常驚喜。在旺角白布街的小小外賣店 I Love You Dessert Bar 出品的梳乎厘班戟，$29 就食到！超級鬆軟，入口即溶，難怪開張冇幾耐即成人龍店。

甜品店的主廚 Perry 是新派私房菜水月的主廚，從日本廚師朋友得知梳乎厘班戟的食譜後，便不斷嘗試、改良，材料只是雞蛋和砂糖，沒有加麵粉，Perry 試過用泰國、台灣、日本的雞蛋，發覺日本中部的雞蛋最有蛋香，最適合用來做梳乎厘班戟。至於點解做到鬆軟且不塌？Perry 話最重要是技術，在攪拌蛋白下了工夫，攪拌時間花上 15 分鐘，才有這般鬆軟具空氣感的效果。最受歡迎的口味是原味，另有自選口味：紅豆綠茶慕絲、肉桂蘋果、芝麻忌廉芝士、木糠忌廉芝士、芒果芝士、熱情果芝士及朱古力芝士。

紅豆綠茶慕絲梳乎厘班戟 $34

紅豆粒粒分明，配上綠茶慕絲，很香滑，蝴蝶是食用威化紙，睇得又食得。

原味梳乎厘班戟 $29

每份有兩件，原味是最受歡迎的口味，質感勁鬆軟，入口即溶，空氣感極強

【Info】

I Love You Dessert Bar

地址：旺角白布街 24 號藝興大廈地下 3A 號舖

電話：2612 2660

營業時間：星期一至四 3pm-12mn；星期五 3pm-1am,星期六 1pm-1am；星期日 1pm-12mn

Whitewood Coffee 呍呢嗱香梳乎厘班戟

估不到在沙田較隔涉的石門尋找到梳乎厘班戟的蹤影！Whitewood Coffee 的老闆之一 Jessica 都是愛「戟」之人！負責整班戟的是她的哥哥 Andrew，他不斷自學調配屬於他們味道的 Pancake。於雞蛋、砂糖、低筋粉次外，更加入呍呢嗱油以增添香味，亦成為了 Pancake 的特色。Pancake 口味選擇有 3 種：原味、香蕉榛子及士多啤梨。全部即叫即整，口感好像極鬆軟的蛋糕，原味 Pancake 所配的加拿大楓糖漿，味道香醇。