美食車駛入中環
$1 蒜香炸雞翼暖場
text : jessie
photo : paul
16 部美食車於上個月輪住於全港 8 個地點登場，只可惜美食車被指食物貴、停泊地點唔方使、無位坐又要曬住太陽食嘢，畀人嗌佢做「離地美食車」，陰公豬！豪園小食美食車 3 月 7 日起，駛入被指是「死位」的中環海濱。為咗帶旺個場，推出 $1 「炸一字雞翼」，之前喺黃大仙及尖沙咀賣 $38㗎！真係好抵食！
炸一字雞翼 $1（8隻起，最多16隻）
豪園小食美食 3 月 7 日起進駐被指是「死位」的中環海濱，為咗自救，負責人梅樂文決定推出 $1 一隻「炸一字雞翼」吸客，呢款雞翼於黃大仙及尖沙咀賣 $38，今次真係筍到爆！
是否西多士 $20
中環限定嘅全新小食，麵包蘸上蛋漿炸到脆身。
配海鮮沙律作餡料，沙律醬嘅酸咪中和西多士嘅油膩。
豪園柱侯牛腩麵 $48
全蛋麵以獨門秘方打成，麵條爽口彈牙。
蟲草花脆脆 $48
蟲草花煲湯就食得多，用嚟炸真係好少見！蟲草花炸到條條脆卜卜，再拌以淮鹽，又鹹又辣又惹味。記得要趁熱食，唔係蟲草花會有少許苦澀味。
檸茶BB $28凍檸茶嘅變奏版，將新鮮檸檬榨汁、打成蓉，加入濃茶膽 mix 成，飲落富檸檬清香，最正係唔使篤檸檬，勁方便。
美食預告！灣仔限定蠔餅小丸子
豪園嘅美食車將於3月21日至4月2日，轉場到灣仔金紫荊廣場，並推出新小食「一口蠔丸」。呢款小食係將煎蠔餅做成一口 size，以薯粉漿、鴨蛋、蠔仔、葱粒等製成蠔餅漿。再整成粒狀並烤至香脆，將蠔餅變成小丸子，創意爆燈！
美食預告！香港海洋公園限定「炸黑松露雲吞」
4 月 4 日至 16 日，美食車將進駐香港海洋公園，並推出期間限定嘅「炸黑松露雲吞」，將黑松露加入雲吞餡，炸至外皮酥脆，充滿菌香。到時記得拎住海洋公園入場證買嘢食，有 9 折㗎！
【INFO】
豪園小食美食車
出沒地點：中環海濱活動空間
營業時間：12:30am – 8:30pm
Facebook：www.facebook.com/hoyuenexpress
註：美食車將於 3 月 21 日至 4 月 2 日停泊灣仔金紫荊廣場；
4 月 4 日至 16 日停泊香港海洋公園