2.28 The Pancake Day 　食均 4 大人氣 Souffle 班戟

The Pantry 空氣感十足！

圓方嘅 The Pantry，餐廳滿布綠色植物，環境好舒服。店內嘅窩夫及班戟都是招牌作，班戟漿用咗麵粉、雞蛋及 Ricotta 芝士手打而成。最正係餐廳勁大，足足有 4,000 平方呎，有 100 個座位，唔使等位等到呆。

The Pantry's Pancakes $120

睇價錢真係有啲貴，但 pancake 一碟 3 大件（平均 $40/件），分量十足！Pancake等咗 10 分鐘左右就有得食，表面呈微微金黃，旁邊有士多啤梨、藍莓、紅莓等伴碟，擺碟有心思。每塊 pancake 約 4cm 厚，唔會一塊高一塊扁。Pancake 空氣感十足，真係似食陣風。略為濕潤，不致糊口。可惜，蛋香唔突出，配搭自家製蜜糖脆粒牛油，味道太膩。反而忌廉可以增加 pancake 滑度。

【INFO】

The Pantry

地址：尖沙咀柯士甸道西 1 號圓方 (Elements) 2 樓 2133 號舖

電話：2348 8219

營業時間：11:30am-10pm

PAN de Pain 蛋白香氣撲鼻！

K11 人氣店，幾乎日日都有人排隊等食 pancake。餐廳唔係日本過江龍，只是老闆及大廚都愛日系甜品，特登飛到東京、大阪和京都試勻當地班戟專門店。店內的班戟由女廚 Muse 主理，班戟配方自家鑽研，以日本麵粉、北海道 3.6 牛乳和雞蛋炮製，keep 返日本嘅味道。

Souffle Hotcake $68

Souffle Hotcake 於每日 1pm 開始供應，店員話製作可能要半小時，但實際只需 15 分鐘就整好有得食！Pancake 呈淡黃色，色澤分布平均。整碟 pancake 賣相無花巧，簡單兩件 pancake 放好，加牛油及忌廉即成。點到即止嘅擺碟，好有日式嘅感覺。Pancake 睇落重啲，每塊 pancake 嘅厚度一致，約 3cm 厚。但食落質感輕飄飄！味道完全係 Souffle 嘅味道，好香蛋香味又有麵粉香。Pancake 做到外表微脆、中間軟熟。濕潤度恰到好處，口感綿密幼滑。加拿大楓糖嘅味道都非常討好，有陣陣楓樹香氣。

【INFO】

PAN de Pain

地址： 尖沙咀河內道18號K11購物藝術館B1樓B111B號舖

電話：2576 1968

營業時間：星期一至五11:30am-10pm 星期六及日11am-10pm

UFUFU 5cm 勁厚！

日本過江甜品店，主打過百款芭菲，仲有爭崩頭都食唔到嘅香港限定嘅芭菲。原來芭菲之外都仲有Souffle Pancake 食，Pancake recipe 交由工場日日新鮮做，以雞蛋、麵粉就做出鬆泡嘅 Souffle Pancake。

鬆軟梳乎厘班戟 $58

Souffle Pancake 等 5 分鐘就上枱，冒晒煙咁好吸引！Pancake 好圓好整齊，上面放咗一球呍呢嗱雪糕及香草，賣相簡約。全場最厚身，約 5cm 厚，仲要係一件過！原味 Souffle Pancake 有淡淡蛋香，但食落感覺似食雪芳蛋糕咁，空氣感不足， Pancake 帶少許濕潤，不會乾爭爭。

【INFO】

UFUFU Cafe

地址：尖沙咀金馬倫道 5 號太興廣場 5 樓

電話：2711 6117

營業時間：12nn-11pm

點子 Little Dot Room  空氣感和風 Pancake

位於堅尼地城的「點子 Little Dot Room」由西營盤甜品店甜品堂的老闆阿端及 Jojo 開設。兩人參考過東京、大阪及台灣的 pancake 名店，試勻全港十多種 pancake 粉，終於試到一隻香港無代理的台灣「鬆餅粉」，做到挺身但軟綿綿的班戟口感，於是不惜工本，直接由台灣運來 4 款班戟粉，加埋運費成本比香港最高級日本貨貴一倍。

「點子」梳乎厘班戟 $88（圖左，於 3pm、6pm、9pm 供應，每時段供限量供應 10 份）

招牌必試是做出東京Bills水準的「點子梳乎厘班戟」，，即叫即用蛋白打起煎，不入爐焗以免變成蛋糕口感，直接在扒爐煎足 10 分鐘，班戟脹身唔塌，吃來滿有空氣感，真係似吃梳乎厘。

（圖中）宇治綠茶日式流心厚鬆餅配豆腐雪糕 $68

做法有點像心太軟，但蛋糕部分換了台灣入口的鬆餅粉做，比心太軟的蛋糕鬆軟，中間放了抹茶朱古力，配豆腐雪糕及宇治抹茶粉，抹茶味甘濃。

（圖右）三重芝士日式流心厚鬆餅 $68

裏面是忌廉芝士加上 Mascapone 軟芝士做的流心，鬆餅望落挺身，但入口鬆軟。

【INFO】

點子 Little Dot Room

地址： 堅尼地城山巿街1 J 地下（近石山街長樓梯）

電話： 從缺

營業時間： 1 2nn - 1 0pm（9:30pm last Order）