㩒個半熟蛋糕！諾亞推自助甜品售賣機

確實推出幾時？未知！部機會放係邊？未公佈，只知會有兩部擺於大學及私人屋苑。知大家對部機都好好奇，一於幫你哋率先試機兼試食！

自助甜品售賣機與一般汽水機嘅外表無分別，用法都係一樣。先於機物的熒幕選擇食物，再用八達通付款。買完仲可以用QR code 或輸入 Email，拎電子收據，好方便。

（左）紫薯推筒蛋糕、（右）抹茶推筒蛋糕 各$22

自助售賣機暫定有 3 款半熟芝士蛋糕、4 款飲品、4 款推筒蛋糕及果仁撻。最新登場的推筒蛋糕，有抹茶、紫薯，以及只限自助售賣機供應的朱古力及伯爵茶味。蛋糕分別有海綿蛋糕、吉士醬、流心忌廉等一共9層，遲啲或者會加埋脆脆增添感。

蛋糕由下面的「針」推出嚟直接食，唔怕整污糟雙手！

機內溫度保持於攝氏 0-4 度，甜品可以存放 3 日。貨品賣完後會有電腦追蹤系統通知工場，按銷售情況每日補貨。自助售賣機特別加設上下移動的升降台，移動至所選食物位置，機器會將食物推出，玻璃樽、芝士蛋糕等都唔會損毀。

（左）芒果半熟芝士蛋糕 $33、（右）士多啤梨半熟芝士蛋糕 $35

招牌的半熟芝士蛋糕變成迷你版，有士多啤梨、芒果及比利時朱古力味。蛋糕選用蛋香豐富的意大利雞蛋、日本海藻糖，以及澳洲忌廉芝士等 3 重芝士製作，蛋糕超流心，唔會水汪汪。行過㩒個蛋糕食，咪話唔過癮！

朱古力半熟芝士蛋糕 $28

底層是原味半熟芝士蛋糕，質地流心呈cream 狀，芝士及蛋香兼備。最讚是表層的朱古力唔會蓋過芝士香，層次豐富。

士多啤梨花茶 $20

由菠蘿、蘋果、杏桃、士多啤梨等 6 種水果，加少許陳皮煮成，果香清新。

玄米奶茶 $20

以台灣、印度及斯里蘭卡 3 地茶葉沖調，茶味無想像中濃，但奶茶入口幼滑順喉。

Info

諾亞半熟蛋糕專門店

電話：2382 6438

註：自助甜品售賣機預計2月尾推出