幫你「找素」！全港 3 大人氣素食自助餐

愈來愈多人踏上「追素」之路，最近太古一間餐廳推出素食自助餐，震撼了每個素食者！不過有唔少朋友話，如果可以晏啲都有得食、地點再方便啲就「PERFECT池」。得！你哋嘅訴求聽到晒，即刻幫大家搜羅 3 間人氣素食自助餐，梗有一間啱你找「素」！

Red Mango Tree 中日韓泰印意式fusion style素食

素食自助餐愈搞愈多，勁平、勁多款式、走年輕路線的乜都有，不過講到最人氣之選，不得不提 Red Mango Tree！Red Mango 是美國乳酪品牌，香港店老闆於 2015 年引入品牌，將乳酪及素食雙綫發展，結果素食 buffet 彈起，booking 爆足兩個月，開業年多即開分店，是素食界的實力派！

新分店位於九龍城，餐廳可以容納 100 人；曲尺形的自助吧枱擺滿沙律、涼拌小食、湯、熱盤、點心、甜品等多達 30 款菜式，部分是蔬菜菇菌豆品做的，也有以素肉製成的元貝、蝦、羊肉串、吞拿魚、魷魚圈，好豐富。菜式變化多多，但無加蛋奶，以植物奶代替牛奶，以庶糖代替蜜糖，盡量少用五辛，以香草代替，烹調多蒸焗、少煎炸，純素者吃得放心，跑素初哥也吃得健康。

最有驚喜的是可以食到印式意式中日韓泰式 fusion style的菜式，款式3日一小轉，每月一大轉，即使是常熟客仔嚟到都覺得有新鮮感。「墨西哥素小元貝」咬口十足，配酸辣番茄醬，酸酸辣辣、帶墨西哥風味。「韓式素魚」以豆製品製成，素魚柳煎得香口，配以泡菜和蜜桃打成的醬汁，香甜酸辣仲有蜜桃甜香。「泰式冬蔭功雜菜煲」香料味層次十足，內有雜菌、雜菜和粉絲，味道不比一般冬蔭功湯遜色。乳酪任唧任吃，是坊間罕見純素版，菠蘿荔枝士多啤梨哈密瓜香芋每天輪流登場，幾飽都要吃。

info

Red Mango Tree

地址：九龍城賈炳達道 128 號九龍城廣場地庫 1 樓 B107-B108 舖

電話：3702 1150

營業時間：11:30am-9:30pm

註：

① 素食自助午餐分個時段，分別為 11:30am-1pm 及 1:15pm-2:45pm。收費星期一至五，成人 $119/ 位、小童 $86/ 位；星期六、日及公眾假期，成人 $130/ 位、小童 $97/ 位，已包加一。

② 素食自助晚餐時段分 6pm-7:30pm 及 8pm-9:30pm。收費星期一至四，成人 $185/ 位、小童 $119/ 位；星期五、六、日及公眾假期，成人 $198/ 位、小童 $139/ 位，已包加一。

=============================

無肉食 $128 素食火鍋夠Gimmick！

香港人至愛烚吓烚吓，素食火鍋又唔知啱唔啱你心水？憑平價素食自助午餐迅即彈起的素食自助餐廳「無肉食」，於冬天推出素火鍋。嘩！夠晒Gimmick！

介紹有乜好食之前先提提大家，素食火鍋以位計，每人$128、兩位起跳。每位客人包一個素食火鍋料包，白菜、生菜、粟米、番茄、勝瓜、金菇、冬菇、雞髀、菇、南瓜、芋頭、雪耳、海帶、豆腐、麵筋，蔬菜來自國內，係漁農署認可的「信譽農場」，食得放心。食菜咁單調？仲有香菇貢丸、脆丸、素蝦球、花枝丸 4 款台灣素丸，與真肉丸相似度達 90%。必試仲有自製雲吞，以金菇、冬菇、雞髀菇和木耳絲做餡，菇菌爽口又有菌香。

打邊爐的另一個精髓是湯底，餐廳有以冬菇熬湯做底的番茄薯仔湯，酸咪咪又清新。以北芪、黨參、當歸、杞子、淮山、紅棗等燉足 6 小時的藥膳湯，滋補暖身。另有加了指天椒、花椒、豆瓣醬、辣醬等炮製的麻辣湯，麻、辣兼備。素火鍋包自助餐內的粥、飯、湯、糖水和飲品。說好的自助餐呢？每位加 $30 則可食埋餐廳的素自助晚餐，春卷、湯、炒蔬菜、壽司等多達 40 款菜式。無肉食，都可以食得好豐富。

info

無肉食

地址：北角堡壘街 10-16 號華㬢大廈地下 B 舖

電話：2528 2368

營業時間：12nn-10pm

註：① 素食火鍋只限晚市，自助晚餐為 6pm-10pm。另有自助午餐時間為 12nn-3pm，下午茶 3pm-6pm（品茶加小食）

② 素火鍋包自助餐內的粥、飯、湯、糖水和飲品，每位加 $30 則可享用素自助晚餐。

=======================================================

素食‧分子平食素食自助餐

想搵地點方便的素食自助餐？有！位於北角嘅「素食‧分子」，於港鐵炮台山站行過去，只是 10 分鐘左右。餐廳開咗兩年多，是區內受歡迎的素食餐廳。白色配木系的餐廳設計，氣氛casual 輕鬆。