元宵佳節已過，屋企嘅桃花點處理﹖丟咗又有啲浪費喎~不如直接俾適合嘅環保團體回收喇!永續尚源社最近推出「桃花回收計劃」，將已回收嘅桃花枝幹，變成種菇嘅原材料，種植可食用菇菌。創辦人 Jessica Yau就向大家詳細解釋咗點樣將桃花枝幹變成菇菌~

永續尚源社創辦人 Jessica Yau。

首先，將已回收嘅桃花枝幹打碎至粉狀。

再混合養分、木屑、廚餘如咖啡渣等變成菇包，進行高溫及高壓消毒後，加入菇種。

當菇種侵佔整個菇包的養分，即係「行菌絲」，菇包內嘅混合物就會由原本嘅啡色變成白色，代表可以十字割開菇包，菇菌準備長出。

自家種菇好容易

如果冇桃花可捐出回收，亦可購買  DIY 菇盒，一嘗喺屋企種植平菇或靈芝嘅滋味!兩種菇都好易種植~只需割開菌絲變白嘅透明菇包，定時噴水保濕（菇菇喜歡 80 % - 90% 濕度生長），約 7 天後一叢叢嘅平菇長出就可收採，採摘後，平菇平均有  2 次再生機會！

而種植靈芝嘅方法就大同小異，但為咗長出一朵傘面更廣嘅靈芝，菇包有固定開口位，當靈芝生長轉棕色，代表可用紙袋笠住收採孢子，靈芝種植 1.5 至 2 個月可收成！

已風乾的靈芝。

微景觀盆栽真的長出菇，好得意！

福記園剩下的桃花亦會回收，變成菇包的原材料。

DIY 菇盒可於 facebook 訂購，包噴水器及種植說明書，$80（平菇）、$100（靈芝）。

種植打理 tips
．保持菇包濕潤，定時噴水保濕。
．冬天天氣乾燥，底盤宜加入水，或以濕水的廚房紙覆蓋菇面。
．如發現菇有綠色，即發霉，不可食用。
．不用放於全陰暗地方，建議放於廚房，但避免陽光直接照射。

永續尚源社將推出兩款半天工作坊，簡易版就俾參加者體驗親手混合木屑、咖啡渣等制成菇包，並帶菇包回家種植，而深入版就包採菇及即時烹調菇類品嘗環節。新推嘅微景觀盆栽工作坊都好吸引~!有別於一般微景觀盆栽，植物生長變化不太，觀賞及食用價值兼備，參加者可 DIY 微景觀，加入菇包原材料，定時噴水，真係長出平菇，好得意！3 月底仲將會同香港永續栽培學院合作，推出 6 節課程，深入認識運用廚餘種植菇菌~!

【Info】

桃花回收計劃．日期︰即日至 2 月 18 日

時間：9am – 6pm（星期一至五）、9am – 1pm（星期六）

回收點︰林村泰亨鄉福記園

名額：100 棵（請先拆除所有桃花的裝飾才送過來回收）

查詢：9848 9775

註︰運送桃花前，預先電話通知，不接受非預約回收，福記園客戶可優先參與回收計劃。首 50 位參與桃花回收人士，可以用優惠價$50 購買 DIY 菇盒乙個。

www.facebook.com/Trash2Treasure-Association-1499642473676869/