獨自食餐好！一人前情人節提案

小毒毒捱得過聖誕，但殺傷力更強情人節又殺到，當豬朋狗友情人節都有那個他 / 她吃大餐、發放閃光彈，孤家寡人唔通要注定啃杯麵？脫「毒」，飲食記者幫你唔到，但情人節「毒自」吃好西我哋都有推介嘅！

擺明獨食一盅兩件點心餐

飲茶？唔係大夥兒專利，在太古城新裝美食廣場 Treats 內的「茶茶居」，早、午、下午茶到晚餐供應的點心，全屬一人的「自樂餐」，明攻單身貴族嘅心。

「自樂餐」濃縮了整個飲茶體驗，因為一份已包括 4 款點心（兩件蒸的、兩件炸或焗的）、飯或沙河粉及米湯灼菜，分量飽肚。點心更是即點即製，新鮮熱辣。套餐唔夠食可額外單點，店內的點心種類頗多元化，像走懷舊路綫的芝麻卷、鳳凰煎米雞和灌湯餃等。部分點心又加了健康新元素，像叉燒酥加了檸檬皮更清香解膩、流沙包就改以燕麥做皮。別以為食點心就成擔豬油吞落肚，這裏全用無膽固醇的米糠油烹調，keep 到身型先至有彈藥追男仔 / 女仔嘛。點心河粉等全部在店內的開放式廚房製作，有嘢昅，情人節一個人嚟都唔怕悶啦。

這裏設有吧枱位，一個人來都吃得自在，仲可看到師傅製作點心和熱辣辣出爐。

半開放式廚房的玻璃上有點心公仔圖案，得意！

自樂餐 $78

筍尖鮮蝦餃、乾蒸牛肉賣、檸香叉燒酥、荔甫炸芋角 x 牛筋腩蒸沙河粉

牛肉燒賣加了檸檬葉和馬蹄，入口清新爽口不油膩；叉燒酥加了檸檬皮，甜中帶清香；炸芋角就以新鮮芋頭搓皮，再包着蝦和帶子等饀料，外脆皮輕軟。牛筋腩加了花椒、八角、柱候醬等紋，惹味又夠腍身。沙河粉更堅揪，用米香濃郁的泰國溝巴基斯坦香米製，最勁係師傅每天在店裏磨出米漿再以用竹筲箕拉成粉蒸製，入口米香濃而煙韌。

自樂餐 $78

甫魚滑燒賣、松子菠菜餃、家鄉鹹水角、沙律炸蝦角 x 排骨蒸沙河粉

燒賣最為特色，加了大地魚粉在餡料中，豬肉外還加了原隻蝦仁和冬菇；菠菜餃內有滑蛋、爽脆的松子、素蝦等。鹹水角內有蝦米、菜脯、肉鬆和冬菇。值得一提是蔬菜以米湯灼過，帶有豐富的米香又有點漿口。

自樂餐 $78

娥姐素粉果、南瓜芋絲餅、素雞絲春卷、舊日煎馬蹄糕 x 南瓜芋頭糙米飯

套餐中也有素食之選，素粉果內有甘筍、木耳、沙角、馬蹄和雪耳，味道清甜；自家創的南瓜芋絲糕以清蒸後再壓成糕，甜而不膩；馬蹄糕只用馬蹄粉和黑糖做材料，不似坊間用生粉，入口香軟彈牙。

除了吧枱，亦設梳化位和小圓枱，空間比一般點心專門店闊落舒服。

公仔圖案餐具，細微細眼處足見店家心思。

【INFO】

茶茶居

地址：太古太古城道 18 號太古城中心 2 樓 255 號舖 Treats 內

電話︰2832 2820

營業時間︰8am - 10pm

備註︰茶錢每位 $6，設加一

搭枱免尷尬！原條魚米綫

情人節，單拖一丁友，搭枱反而自在，成枱人陪你食米綫，感受到一絲溫暖。推介巴打絲打嚟呢間「魚米」，有靚裝之餘，魚湯米綫成條魚放喺面，呢個獨享情人餐，霸氣唔失禮！

海魚經半煎炸，再逐碗連同魚湯、米綫等同煮，湯頭更甜，味道亦因應魚種而略有不同，煙韌爽口的米綫也更入味。原條魚共有 12 款，可以自選。筍殼肉質細嫩，䱽魚或左口骨頭大件易拆又有魚味，啖啖肉又有紅鰂和烏頭。其中筍殻和黃花魚主要由香港仔魚市場入貨，每條魚都有 8-10 兩重，一個人食，分量啱啱夠獨食！

湯底都以 20 幾斤的魚和 10 多斤的豬骨煲，裏面有大量九棍魚和紅衫魚，煲 4-5 小時熬出精華，前者襟煲熬出魚味、後者味甜湯呈奶白，啖啖湯都是海魚的鮮味。最緊要是價錢經濟實惠，單拖過節何必像一雙一對般破費。

吃米綫，通常都是快來快去，但這裏因為要啃骨吃魚，大家都不趕不忙，一個人都可以慢慢吃。

原條黃立䱽魚米綫 $69

黃立䱽勝在少骨又啖啖肉，本身香脆又不刮口，魚皮帶點點魚油脂香，會融在湯頭中，份外鮮甜。

魷魚仔、帆立貝麻辣米綫 $47

小店有 10 多款餸可自選，其中新鮮魷魚仔由香港的魚市場入貨、帆立貝屬日本貨，麻辣湯底則在魚湯裏加上麻辣醬和花椒、八角等 7-8 種香料製成，香辣平和不嗆喉。

原條筍殻魚米綫 $61

件頭十足的筍殻魚由國內釣起即送到香港仔，半煎炸後再落湯和米綫一起煮；每碗更有芽菜、已撈炸蒜的葱花、榨菜、韭菜和新鮮腐皮，甚為豐富。

酸辣酸菜鯇魚腩米綫 $61

愛重口味的，可選擇酸辣湯底的米綫，全部以 20 幾斤重的養殖鯇魚入饌，加了大量酸菜在魚湯中煮過，又可自由配搭魚尾、魚鮫、魚腩等不同位置，湯頭酸中微辣，不失魚湯的甜，推薦揀魚腩位，只有幾條大骨，嫩滑易食。

【INFO】

魚米

地址：大圍積福街 86 號康樂樓地下 F 舖

電話︰2698 2007

營業時間︰7:30am - 11pm

備註︰不設加一，只收現金

等一個人韓式炸雞

宅女無愛人，最佳慰藉梗係一邊睇住敏鎬、仲基、孔劉呢啲 Oppa 歎炸雞，情人節避世最啱。Seoul Bros 的一人份韓式炸雞，買返家又得，堂食又得！炸雞口味有甜辣和甜酸 2 款，全都不帶骨，用雞髀肉製配薄身脆漿，蘸滿了醬都不會變得腍身；咬下香口惹味，雞肉保持濕潤，雞件還有幾件 bonus 的煙韌年糕，最重要係變成一人份，單拖都食得晒。睇埋價錢，實在不能挑剔，毒男毒女忍不住叫好吧。

化 lonely 為食量，一口氣乾脆點埋這裏的變種韓食，好似雞肉越式法包三文治、走 Fusion 路綫、以蝦為主角的韓式拌飯等。順手點埋加了泡菜的薯條就最啱，薯條配上車打芝士醬，加泡菜和紫菜而成，不算太辣但芝士味超濃。狂擦炸雞 + 拌飯 + 芝士薯條，有卡路里陪我，孤單有乜好怕？