此日期前最佳 照食唔會嘥

text/Eunice
photo/Brian

  
新一年，祝大家豐衣足食！最緊要食得唔好嘥！

但，你有冇試過將屋企有「此日期前最佳」食物丟咗去垃圾筒先﹖唔好咁樣啦，佢哋可能口感差啲，唔係最好味道，仲食得，就咪浪費。

你亦可支持 Green Price 綠惜超級市場，購買 best before 食物，把食物從堆填區拯救！

best before =/=used by

介紹社企  Green Price  前，必先了解「此日期前最佳」（best before）、「此日期或之前食用」（used by）的分別，好多人以為一樣，有理無理見過期，即係唔食得！「此日期或之前食用」指預先包裝食物特別容易腐壞，如過期後食用，可能會對人體健康構成即時的危險過期食用不安全，而其他預先包裝食物標示「此日期前最佳」，代表食物在此日期之後，未必能保持最佳味道及品質。根據目前的規例，售賣過了「此日期或之前食用」日期的食物，即屬違法﹔過了「此日期前最佳」日期的食物，並不違法。但，好多零售商唔願意賣接近 best before 期限的食物，進口商或批發商冇從去貨，更不用說逾 best before 期限的食品，命運如逾萬筒果汁軟糖、可樂、果汁、果醬一樣，被棄垃圾站。

減少食物浪費

由 4 位年輕人成立的社企  Green Price 綠惜超級市場，目的盡量把「此日期前最佳」食物，從堆填區拯救出來，減少食物浪費，以低價銷售將會或剛過最佳食用日期，但絕對安全、保質及合法的食品。創辦人之一的 Terence 話貨源唔穩定，每次四出找零售商、批發商及食品廠，是否願意提供寄賣或捐予食品，「好多商戶以前整板車的貨，最後選擇運往堆填區，非常浪費。之前聖誕，有時商戶會入好多貨，但錯誤估計銷情，好多最後賣唔晒，我們就收得較多貨。」他補充，絕不接受個人捐贈「此日期前最佳」食品， Green Price 不會代處理個人食唔晒的食物。

歡迎試食 啱食先買

四人收取貨物及獲捐贈的食品，與供應商一起進行檢查，了解食品的質量，點為之正常水平，即係試食！Terence 話以薯片為例，較易唔脆，每當有貨返盡量促銷，品質較好，易賣完。他們賣的食物介乎「此日期前最佳」前後 3 個月，如有部分貨品滯銷，質量沒變壞，以自由定價形式出售，大原則係「蝕本都要賣出去」！Green price 現設網店、逢星期六及日舉行 popup store 及不定期參加環保主題市集，他說︰「香港人購物喜歡見實物多啲，尤其是食品過了 best before ，popup store 設試食，食完啱口味先買，亦提醒客人唔好買大量，真係食得晒先好買。」日本零食如餅乾薯條最好賣，$35 盒白x戀人，真係抵到不得了，Green price 創辦人之一  Ken 表示︰「日本零食的最佳食用期限，與其他國家出產同類產品相比訂得較短，如這盒朱古力餅生產日期為 2016 年 8 月，但 12  月已經係 best before ，試食過就知品質不變。」Terence 希望日後 Green Price 透過參加市集，接觸更多基層人士，有助他們減低生活開支，以平價購買 best before 的食品及零食。

【INFO】

GreenPrice 綠惜超級市場

地址︰觀塘開源道 60 號駱駝漆大廈 3 期 5 樓 N 室（popup store 限星期六及日 1pm - 7pm）

每次售賣不同食品，售完即止。
www.facebook.com/greenprice.supermarket/?fref=ts