Ryan Gosling 六步里程
Ryan Gosling，呢期熱爆。睇完《星聲夢裡人》（La La Land），好難唔迷上佢。才華滿瀉、堅持理想、着西裝靚……已夠癲，仲要長情。 又或者，你迷咗好耐。由以下任何一部起。
04'《忘了．忘不了》
Ryan 又係扮窮仔，愛上富家千金 Rachel McAdams，被拆散、分開、再遇，女的已有未婚夫……而 Ryan 又不改初衷咁等，女觀眾勁 buy。Ryan 第一部成功商業片，同 Rachel 變成現實情侶。
07'《Half Nelson》
如果你睇過，堅係忠粉。黑人學校當中受歡迎的白人阿 sir，真心關懷學生。慘豬女孩一開波已目睹阿 sir 吸毒，成為兩人的秘密連結。Ryan Gosling 第一次提名奧斯卡影帝。
10'《有人喜歡藍》
都係愛情片，但完全反童話，只有殘酷現實。觀眾眼巴巴睇住兩個人，明明如此相愛，行下行下，去咗死角，低氣壓得想在戲院大叫。
11'《極速罪駕》
型到核爆！極少對白，單靠型格，連名都冇。日間是特技人、夜晚做車手協助罪犯逃走。唔聲唔聲，鍾意咗鄰居後生阿媽，知佢唔生性老公就快坐完監，決定打劫幫她還債。電梯那個 kiss，經典。
12'《末路車神》
又係電單車特技人，意外知道前度幫自己生咗 BB，自覺有責任照顧，決定打劫搵筆錢畀佢。超憂鬱，最重要係，Ryan Gosling 畀女主角 Eva Mendes 私有化咗，生埋兩個女。
16'《星聲夢裡人》
同 Emma Stone 第三度合作，收埋《滾搞了愛情》六嚿腹肌，但呢段感情超好睇，浪漫有時傷感有時。成部戲都問緊：點解最美好的時光，都不能倒流？最後已事過境遷，長街風景已變……咁都唔感動，唔好話畀人知。
