哥哥，誰能代替你地位？
事先聲明，一篇短文實在不能夠寫得晒哥哥經典時刻。既然當我哋唔能夠再擁有嘅時候，唯一可以做嘅，就係令自己唔好忘記。那麼，就讓我們好好記住哥哥給我們留下的經典moments。對於哥哥的種種，就像《阿飛正傳》旭仔所說：「要記得嘅始終都會記得。」你記唔記得？我何止記得，直頭記憶猶新。
1977年，哥哥參加麗的（亦即後來的亞視，不過已經唔存在嘞）的亞洲業餘歌手大賽，參加曲目是《American Pie》。入行後，拍過不少電視劇，像《鱷魚淚》、《浣花洗劍錄》、《甜甜廿四味》等，即使未算紅，已經滲透一份與別不同的氣質。但哥哥後來講番，當時形象可能太反叛，好多人唔接受，上台唱歌仲會畀人噓、甚至用粗口鬧。
Hey，當年你買嗰隻《Stand Up》係熒光綠定熒光紅封套？我就買咗綠色嘞（其實想買晒兩隻，但邊有錢吖唉）。今時今日睇番個MV，依然有種想立即企起身跟住唱的亢奮。補一句，MV拍攝地點是上環磅巷。
《失業生》，雲集了哥哥、陳百強、鍾保羅。回看，無限唏噓，唉。 
《烈火青春》你或許只會記得哥哥和葉童的sex scene（哥哥都話，葉童是他極欣賞的女演員），而我記得卻是這一幕——哥哥的微笑 + David Bowie《Heroes》專輯內的吶喊。一切已失去，不可以再追。
應該是香港電視史上最最最最最經典音樂特輯——《日落巴黎》。導演是吳宇森，演員是張國榮 + 鍾楚紅 + 張曼玉……絕對crazy之陣容！
「1960年4月16號下晝三點之前嗰一分鐘你同我喺埋一齊，因為你，我會記得嗰一分鐘。由而家開始，我哋就係一分鐘嘅朋友。呢個係事實嚟，你追唔返，因為已經過去咗。」塵世間只有哥哥才能駕馭這段對白。
一絲絲夢幻般風雨，路隨人茫茫。寧采臣與小倩，一段香港電影史最美的人鬼戀。 
《金枝玉葉》呢齣戲，好多人鍾意；主題曲《追》，肯定人人鍾意。 
《家有囍事》隨時係你同我翻炒得最多的電影。問心，星爺固然好笑，但更好笑的其實是哥哥的常騷。我諗我呢世都記得佢嗰句對白：「生仔痛吖嘛！」 
當年哥哥留著長髮唱《大熱》，好大爭議，有人話接受唔到……但睇勻成個香港樂壇，試問邊個夠膽咁做？
哥哥講過，梁朝偉是他極欣賞的男演員，可惜冇機會合作（《阿飛正傳》沒有對手戲，《東邪西毒》只合作幾場），直至《春光乍洩》，二人終於作出了一次絕對徹底的合作。一對異鄉人在阿根廷，相濡以沫卻注定分開。「不如我哋由頭再嚟過？」——可惜塵世間好多人和事，冇得由頭再嚟過。
哥哥做過太多經典角色，《霸王別姬》的程蝶衣，經典中的經典。
怎能少得了梅姐。由電影《緣份》開始，演富家千金的梅姐誓要把大學畢業生哥哥追到手。但最經典淒美肯定是《胭脂扣》。如花十二少，生死兩茫茫。女的念念不忘，到陽間尋尋覓覓，找回那個不知是否逝去的愛郎……誓言？早就幻作煙雲字。
芳華絕代，一次哥哥梅姐的經典合唱，一個只有他倆才能匹配的形容。MV導演正是哥哥，大抵惟有他才能捕捉梅姐的絕代芳華。
一個必睇訪問。哥哥在《今夜不設防》完全不設防，由自己出道辛酸到樂壇頒獎禮內幕甚至連自己當年失身的年齡經歷，毫無保留，真情流露。這就是香港曾經擁有的80年代。
《今夜不設防》重溫：
https://www.youtube.com/watch?v=5zWmfSejqiI