有你有我有情有生有死有義！入門喪屍！
一齣《屍殺列車》，令好多人對喪屍片改觀——原來喪屍片咁緊張刺激又咁有情有義！對喪屍片改觀甚至有少少鍾意咗喪屍片的你，如果想進入喪屍片世界，不妨先睇以下呢堆，同樣較易入口！
咁當然，少少核突就在所難免。《地球末日戰》（World War Z）
當全世界正遭受喪屍肆虐，只有畢彼特能夠拯救世界！就算美國軍方咁多人，但都要專登搵畢彼特重出江湖！就算全球咁多專家，但只有畢彼特咁醒目解得開喪屍弱點！唔好問點解，唯一解釋：畢彼特型囉。
《笑死人凶間》（Shaun of the Dead）
喪屍肆虐時，撞啱也是男主角重新思考自己人生時；他一心重整人生軌迹，但同時又要面對喪屍襲擊……英式幽默包裝下的喪屍片，最後男主角同變成喪屍的好友繼續做friend活於同一屋簷下，達至人屍共融新境地，問你服未。
《熱血喪男》（Warm Bodies）
人同喪屍，除咗做朋友，仲可以成為情侶。《熱血喪男》的喪屍男主角，咬死女主角男友，這一人一屍，明明應該有仇，卻日久生情，譜出戀曲，愛是永恆當所愛是你！
《喪屍樂園》（Zombieland）
呢齣好好睇，好睇在將喪屍臨城的末日氣氛，結合青春期的抑鬱，變成一齣異質青春片。仲有，當年未算太紅的大眼妹Emma Stone，真係好靚（咁當然而家都靚）。
《28日後》（28 Days Later）
《28日後》前的喪屍，行路慢過蟻；《28日後》後的喪屍，個個變成奧運短跑金牌選手！從此以後喪屍片中的人類，變得更加趕頭趕命，跑得慢啲都冇命。
《生化危機》系列（Resident Evil）
Well，堪稱一個最長壽喪屍片系列，由2002年第一集到出年上映最後一集，足足磨足十五年（Milla Jovovich由廿幾歲拍到四張……），真係睇開有感情。但嚴格來說，只得頭兩集較為好睇。
《生化壽屍》
香港超經典喪屍片！經典在成齣戲幾乎喺炮台山新時代廣場拍晒！經典在黎耀祥的超精彩賤格演出！經典在葉偉信不受限於超低成本的精準導演手法！經典在李燦森陳小春的合作！仲有……湯盈盈的經典忘我演出！（睇過自然會明。唔明？請自行搵嚟睇）