盂蘭節氣魄更壯，睇齣鬼片心中依然驚慌～

古語有云：每逢鬼節倍思Ghost。
所以難免在一年一度盂蘭節，睇番齣鬼片或恐怖片應節。
估唔到，有啲恐怖片畫面，事隔多年睇番，依然嚇到個心離一離。

貞子爬出電視，我只覺好笑；但當佢咁樣矋住我，我就真的驚慌了——呢隻究竟係左眼定右眼？Why佢一定要用單眼？係咪單眼矋人矋得太多搞到滿布紅筋？

撞邪有幾可怕？《驅魔人》話你知，除咗會將個死人頭擰去後面同人say Hello，仲會變成彭丹拱住橋落樓梯。Oh My God！我唔想做拱橋，我唔想做彭丹！

如果你喺屋企走廊行行吓撞到呢對閃靈Twins，你會點？——Sorry，你先要問自己屋企走廊有冇足夠空間容許一對孖妹並排而立。

有人話，近年冇乜勁驚鬼片——當然有啦！《詭屋驚凶實錄》呢一幕，失驚無神有對手從黑暗中伸出來拍手掌，嚇到標shit！

《見鬼》呢一幕，好多人話驚。換轉我，lift門打開時見到有個阿伯背住我企喺角落度……咪等下一部囉，使死吖。

《凶榜》，香港開埠以來最恐怖之鬼片！大口青，香港開埠以來個口最大之鬼！

問心，《餃子》唔太恐怖，最恐怖的，只是千嬅個妝、千嬅食相，以及——白～靈～

蜈蚣一咒，大難臨頭！80年代《蜈蚣咒》李殿朗唔好彩中咒，搞到口吐生蜈蚣，好彩最後解到咒。不過，一旦成為人形蜈蚣，就從此冇得鬆——咁都未算最慘，最慘是做唔到蜈蚣頭，被安排做蜈蚣尾……

《幻海奇情》呢集「四人歸西」，唔係講笑，嚇到我餘生都不敢打牌！

Well，如果一生中注定要撞一次鬼，可唔可以係撞見棉花糖先生？正宗嚇Cute死。