全港獨家！Crazy Car 甩尾主題Cafe

之前觀塘及元朗都有賽車場，不過兩個場都已成歷史。最近於荔枝角D2 Place Two 開咗間佔地13,000呎，甩尾主題嘅 Cafe，將 Cafe 及 迷你賽車場結合，車迷又可以過吓飆車癮！

呢個迷你賽車場唔係大朋友嘅專利，只要係身高達到 120cm 就可以落場做車手。大朋友嘅話，唔超過 240 磅就玩得！玩之前會有職員詳情講解部車點控制、點樣剎車等，仲提供頭盔、護手護腳套畀你！每 round 可以玩 6 分鐘，最多10-12架車落場！嚟一場親子賽玩一轉，諗起都爽！

負責人強調，呢架並唔係高卡車，而係電動甩尾車！講到明係玩甩尾，所以負責人於佔地約 9,000 呎嘅迷你賽車場，set 咗 14-15個彎。要做到甩尾只需要拉起車身旁邊嘅桿，於入彎前將軚扭反方向扭90度，咁就可以做到勁有型嘅甩尾！唔好以為好難，拍攝當日見到 6 歲嘅小朋友都做到！

玩到肚餓，可以過隔離嘅 Cafe 醫肚！Cafe由小食到勁豐富嘅剧扒都有！餐廳仲襯返個主題㗎，地下貼咗啲斑馬線及行車線做裝飾。

西班牙極黑豬鞍扒 $198

5-6安士嘅西班牙鞍扒先煎至半熟，再放焗爐焗至7-8成熟。豬鞍扒咬落有肉汁，伴以自家製燒汁，為豬扒提鮮。

宇治金時窩夫 $68

窩夫外面脆卜卜，中間鬆軟似蛋糕，配抹茶雪糕及一大球紅豆蓉！

瘋狂雞中翼 $68/5隻

雞翼烤到金黃香脆，秘訣原來是分別以兩種油溫去炸，juicy又惹味！

Oreo沙冰 $48

以牛奶朱古力粒、Oreo及呍呢嗱雪糕打成，朱古力味濃郁。

Info

Crazy Car Cafe

地址：荔枝角長順街15號D2 Place Two 2/F

電話：3428 5298

營業時間： 10:30am-10:00pm