味道似金莎！ 榛子朱古力刨冰
文、攝：jessie
今年冬天遲晒大到，仲要來去如風、無定向！凍唔夠一個星期，轉個頭又回暖！一於自製冰凍感覺，用自己方法搵冬天返嚟！好 easy 啫，去食刨冰啦！呢個榛子朱古力刨冰，唔單止大堆頭，食落味道仲好似金莎，過癮！
榛子朱古力味刨冰 $85
於銅鑼灣嘅 SHARI SHARI Kakigori House 氷屋，不時按季節及節日推出新口味刨冰。最近聖誕有呢個榛子朱古力味刨冰！呢碗頭咁大嘅刨冰，用咗日本進口嘅冰磚，配以日本製嘅刨冰機製作。刨成雪花般嘅刨冰之前，店員會先將冰磚放室溫稍為回暖，刨出嚟嘅冰唔會食到人牙關打震、凍到頭痛。
刨冰面仲有聖誕老人做裝飾，聖誕老人嘅大頭係白朱古力，佢個身係紅莓，好可愛！
刨冰幼細，如棉花般輕，入口即融！刨冰面及中間都淋上榛子味糖醬，食到底都有榛子醬味道！榛子味道濃郁，配埋中間嘅朱古力條食，味道確係有啲似金莎！
【INFO】
SHARI SHARI Kakigori House 氷屋
地址：銅鑼灣希雲街 14 號地舖
電話：2529 1223
營業時間：1pm-11pm（12 月 23 至 25 日營業至 1am）