小丸子 x Izumi Curry 期間限定 Cafe 開催！
小丸子嘅粉絲，聖誕節唔怕無節目！而家尖沙咀美麗華及葵芳新都會再多兩間小丸子期間限定 cafe！兩間 cafe 分別用咗歐陸風及烹飪班為主題，有咩必掃精品及得意食物？率先帶你落現場睇！
陪小丸子上烹飪班 再同小丸子屋企人 high tea
觀塘一田嘅小丸子以萌爆貓咪 look 示人，不過好多小丸子粉絲，都想見返小丸子嘅真面目！葵芳「櫻桃小丸子 X Izumi Curry」期間限定 Cafe，以 3 年 4 班的烹飪課作為主題。
▲店內的佈置似足小丸子嘅班房，鋪天蓋地都係小丸子及同學仔嘅蹤影，所有朋友仔都換咗勁型嘅廚師服飾。
▲小丸子做乜咁嘅樣？原來佢煲燶湯呀！
▲仲有細人位㗎！每個座位嘅背後都印有各同學嘅名字。
▲門口有小丸呀，粉絲們 selfie 位！
▲尖沙咀店以歐陸風格為主題，門口有小丸子一家六口嘅 1:1 立體公仔！
▲換上靚靚裙仔嘅小丸子，即刻變身淑女，融入高貴嘅歐陸風裝潢。
▲小丸子 USB （售價待定）
葵芳及尖沙咀嘅期間限定 cafe 都有精品畀你掃，仲要跟觀塘店嘅精品唔同㗎！呢個 16GB 嘅小丸子 USB 真係超級可愛，唔捨得用呀！
▲小丸子雨傘 （售價待定）
葵芳及尖沙咀限定，有 3 款㗎！
▲小丸子水杯（售價待定）
水杯有 4 款，印咗小丸子屋企人嘅嘜頭。
▲小丸子月曆 （售價待定）
新一年又到喇，買定個新月曆啦！
▲小丸子袋仔 （售價待定）
一式 3 款嘅拉鍊袋仔，係日本製㗎！
▲惠顧滿指定金額，分別加 $58 及 $68，即可換購餐廳主題限定杯碟！餐碟有小丸子、小玉及丸尾班長 3 款。
▲只要於三間 Cafe 集齊印章，即可在尖沙咀美麗華 You & Me 精品專門店獲得額外 9 折優惠（特價貨品除外）！
期間限定小丸子菜式
▲照燒雞扒飯 $109（包罐裝汽水；蘋果汁、橙汁加 $4）
小丸子好可愛呀！除咗有紫菜扮頭髮，仲用咗車喱茄做面豬！
▲奄列牛扒薯餅咖喱飯 $105（包罐裝汽水；蘋果汁、橙汁加 $4）
呢個其他分店無得食㗎！薯條上有小丸子及花輪同學大頭。
▲（前）明太子海鮮意粉、（後）辣肉腸鮮茄意粉 $109（包罐裝汽水；蘋果汁、橙汁加$4）
明太子海鮮意粉有大蝦、磨菇及半熟蛋，好豐富。另一個係葵芳店限定！酸咪茄汁配微辣嘅辣肉腸，好惹味！
▲叉燒咖喱烏冬 $85（包罐裝汽水；蘋果汁、橙汁加 $4）
葵芳店限定！烏冬掛滿濃厚咖喱，配厚切叉燒，正！
▲芝士薯條 $29
只限葵芳及尖沙咀店！薯條上配以濃厚的芝士醬，好惹味！
▲仲有幾款預計於 1 月中出場嘅菜式，呢個係足球健將大野同學！
▲野口同學個 look 都好可愛！
▲呢個係丸尾同學嘅媽媽！廚師用咗肉丸扮成媽媽嘅頭髮，好爆笑！
▲鮮茄漢堡扒意粉、明太子海鮮意粉 $109（包罐裝汽水；蘋果汁、橙汁加$4）
鮮茄漢堡扒意粉只限尖沙咀店！意粉蘸滿番茄蓉，酸咪開胃！
▲吉列炸蝦芝士漢堡扒飯 $119（包罐裝汽水；蘋果汁、橙汁加 $4）
▲抹茶沙律 價錢待定
【INFO】
「櫻桃小丸子 X Izumi Curry」期間限定 Cafe
尖沙咀店：
地址：尖沙咀彌敦道 118 號Mira Mall 1 樓 110 號舖
電話：3104 1904
葵芳店：
地址：葵芳興芳路 223 號新都會廣場 1 樓 109 號舖
電話：3104 0457
Text：Jessie
Photo：Lok
