旺中小清新 幻彩特飲幫你打氣

旺中 1 樓開咗新食場，繼星級小店賣饅頭漢堡，以及手臂咁長嘅巨型窩夫，仲有呢間開業差不多兩星期嘅特色飲品店 HeaLaHoMa。舖頭名咁古怪嘅？你試吓讀出嚟，其實即係「Hea 啦好嘛」！4 位 20 出頭嘅年輕人，見香港人日日做到有氣無得唞，好想有個空間畀大家放慢腳步休息吓。年半前其中一位負責人 Doris 搞咗湖畔市集，於市集試賣 3 款特色飲品，見大受歡迎，於是搵舖位落地生根，借飲品 sell Hea 嘅生活態度。

(左）Grass Hopper、（右）Blue Monday $25/ 膠杯、$35/ 玻璃樽
小店暫時有 10 款特飲，全部都是以果味糖水加梳打製成。開店前仲搵咗專業調酒師學藝，學吓點 mix 出最好味嘅配搭。藍色係主打嘅 Blue Monday，用咗柑橘、橙、檸檬等調製，酸咪咪又好 fresh！想要清新仲有青綠色嘅 Grass Hopper，用咗哈密瓜、檸檬、梳打及汽水混合而成，唔止樣靚，哈密瓜味好 sweet！

Sunset $25/ 膠杯、$35/ 玻璃樽
橙色嘅係自家製雜果賓治，主要喺加咗大量橙汁、檸檬汁及黑加侖子汁，橙味較重，味道酸酸甜甜。

Flamingo $25/ 膠杯、$35/ 玻璃樽
紅色底加白色嘅 Flamingo 以黑加侖子汁溝梳及汽水，黑加侖子汁唔會有藥水味，仲食到新鮮菠蘿粒㖭！

Life （聖誕限定）$30/ 膠杯、$40/ 玻璃樽
小店會定期推出限定版特飲，12 月就有聖誕限定嘅 Life。4 層顏色特飲用咗橙汁、菠蘿、黑加侖子等 5 至 6 款果汁及梳打製成，店主教影完靚相記得要 mix 勻先飲，果香清新，啱晒呢個暖笠笠嘅聖誕節！

【INFO】
HeaLaHoMa
地址：旺角彌敦道 688 號旺角中心 1 期 1 樓 F86A
Facebook ：healahoma
營時時間：11:30am-11pm