率先睇！ 小丸子 Cafe 聽日開喇！

小丸子，由細睇到大！唔知有幾多人同小記一樣，覺得小丸子嘅性格跟自己好似，睇親卡通片都好有共鳴！小丸子就好似你個 frd，一樣咁親切！

聽日（12 月 17 日）開始，小丸子由日本帶埋老友小玉、花輪、野口等，換上萌到令人尖叫嘅貓貓造型，喺觀塘一田開期間限定「MarukoNyan Cafe  by IZUMI CURRY@YATA」。睇吓，成間 cafe 都係小丸子，影相先啦！

超萌嘅貓貓造型，係今年秋天初次現身！古靈精怪嘅小丸子換上貓咪造型，用慵懶嘅姿態喺貓貓世界生活。哎呀，我都想做貓呀！

仲有小玉、花輪、野口、丸尾班長、小渚及永澤同學，全部都係貓！

奄列吉列豬扒咖喱 $119（包罐裝汽水；蘋果汁、橙汁加 $4）
招牌咖喱飯又點少得小丸子蹤跡？飯面上用咗紫菜粉印咗小丸子、小玉、花輪或野口同學嘅嘜頭，好可愛呀！

抹茶炒飯 $99（包罐裝汽水；蘋果汁、橙汁加 $4）
你知唔知小丸子喺邊度出世？佢係嚟自靜岡縣㗎！餐廳用咗靜岡縣名物抹茶粉，加入炒飯入面，綠色嘅炒飯你又敢唔敢挑戰？

抹茶咖喱飯 $105（包罐裝汽水；蘋果汁、橙汁加 $4）
唔通小丸子都係抹茶迷？除咗抹茶炒飯之外，仲有抹茶咖喱飯！咖喱入面有雞件及雜菜，不過抹茶味唔算明顯。真抹茶迷可能會失望。

雞肉飯團配關東煮 $85 （包罐裝汽水；蘋果汁、橙汁加 $4）
新配搭！之前同咁多個卡通人物 crossover 都無關東煮！雞翼、蘿蔔及雞蛋等食材煮到勁入味，配雞肉飯團，仲有小丸子貓咪紙牌仔，卡娃依呢！

芝士竹輪天婦羅 $45
小食都有全新選擇！呢個芝士竹輪天婦羅，入面嘅芝士餡唧晒出嚟，好邪惡呀！

大阪燒 $79
小丸子大阪燒有大量椰菜做餡，加埋勁多日本燒汁及沙律醬，好惹味。

多瑙河特飲、薄荷特飲、草莓特飲 $39

想帶小丸子走？只要食任何一份主菜，加 $48 可換走小丸子水杯。加 $48 及 $68 分別可換大、細 size 碟一隻。12 月 17 日 5pm 小丸子將會與同學仔喺 cafe 等大家！

Cafe by IZUMI CURRY限定咕𠱸 $230
仲有精品要掃呀！必掃 Cafe by IZUMI CURRY 限定咕𠱸。

（左）小丸子 Tote Bag $148、（右）小丸子背囊 $330

保溫杯 $230

【Info】
MarukoNyan Cafe by IZUMI CURRY@YATA
地點： 一田超市（觀塘）apm LG
開幕日期： 12 月 17 日 5pm 
營業時間：12 月 18 日起 10am-10pm