軟硬製造！
我們都聽過的整蠱電話！
葛民輝有新節目，ViuTV《Tap & Go 拍住賞籌旗》有冇捧場？如果睇完 one man show 未夠喉，不妨重溫軟硬電台年代經典環節。有幾經典？由阿葛本人口述重溫！
1992年：整蠱電話 ＠《老人院時間》
時下通街電話騙案，上世紀呢？「整蠱電話」只此一家。每集軟硬致電大小商店、食肆，既一本正經又嚴肅地詢問一啲無聊問題。阿葛憶述：「老人院節目需要有前奏，我哋唔想一開波就鬼渣咁聲——我係林海峰！我係葛民輝……唔想做呢個動作咪用整蠱電話開場。」想當年阿葛打去唐朝問點解得白粥冇黑粥 is a joke？打去唱片舖叫人唔好收埋劉德華？打去 ESPRIT 話係『三 SPRIT』整蠱店員最後畀人識穿……笑到肚痛流眼水，「當年有本雜誌附送分類小廣告書仔，咩通渠呀賣二手狗呀都有，我哋純粹打去了解下個世界不恥下問啫。」
1988年：《軟硬天師講鬼故》
要驚定要笑？後者！但都有人嚇到面青青。「當年友台都未製作鬼故節目，商台就話有個時段要我哋頂一頂，不如講鬼故啦。我哋咪用軟硬的方式切入無聊鬼故事囉，即係話嘩有隻鬼流緊綠色口水跳埋嚟吖好驚吖呀……最緊要『呀』得夠大聲，最後要聽眾聽完有『妖』呢下先算成功。」詭異的事，明明堅唔驚都有少女 fans 晚晚喊驚。
1992年：讀信環節 ＠《老人院時間》
嚴格來說讀信並非一個環節，但對軟硬 fans 嚟講是個解唔開嘅情意結，「讀信有咩好聽呢？莫非想知你啲字值幾多分？最好聽梗係我哋撕信聲啦！」縱橫廣播界相信只得阿葛阿 Jan 敢撕讀者來信，「後期有啲聽眾直頭喺信入面寫——這是最後一句請你撕信吧！仲叫我哋大力啲撕先夠痛快。」」軟硬做的不過是正常人唔做嘅嘢，「你諗到又敢做就得，創意有時就係咁。」
