Mark 實日子 5 大聖誕市集開催

聖誕節愈近，購物慾愈高漲，唔想買大路連鎖店貨色做禮物，或裝飾布置，但又冇咩時間 DIY handmade，去聖誕市集就啱晒你！11 月底起各大聖誕市集開催，好 mark 定日子啦喂！

text/Eunice photo/有關機構提供

城中 5 大聖誕市集，首推太古地產白色聖誕市集，一家人全日食、買、玩好去處！今年更延伸至灣仔星街小區，而 12 月初太古坊糖廠街市集，更舉行全港首個戶外擲雪球比拼，諗起都想玩！想有歐洲聖誕市集 feel，去 Hullet House 聖誕市集或赤柱聖誕市集冇失望，至於愉景灣聖誕周日露天市集都唔錯，可順便影埋聖誕裝飾！

1 灣仔星街 x 太古坊糖廠街白色聖誕市集

太古地產白色聖誕市集，即將回歸，今年以 Homemade Happiness 為題，及延伸至灣仔星街小區，於 11 月 25 日及 26 日率先亮相，12 月 3 日至 5 日則回歸太古坊糖廠街。星街小區市集內 Happiness Express 聖誕車隊，售賣自家製美食及精緻禮品，更可走進車箱內參加創意手作坊，自家製個人化聖誕玻璃瓶及獨一無二的聖誕裝飾並能品嘗美食。
今年的重頭戲是太古坊糖廠街，全港首個戶外擲雪球場地！只需要捐款，可即席與親友組隊進行二對二比拼，上演一場雪球大戰！屆時超過 25 個特色攤檔，將遍佈糖廠街及太古坊辦公樓大堂，選購聖誕精品、體驗創意工作坊、欣賞娛樂表演及品嘗特式美酒佳餚。市集收益將撥捐「愛心聖誕大行動」，以支持多個本港及區域性社福機構。

太古地產白色聖誕市集

星街小區市集內 Happiness Express 聖誕車隊。

全港首個戶外擲雪球比拼@太古坊糖廠街。

聖誕老人玩轉TaikooGo 2016 為聖誕野外定向比賽，每位參加者可獲贈限量版聖誕老人服飾和豐富禮品的聖誕老人禮物包。

太古坊糖廠街市集內逾 25 個攤位，匯聚各種聖誕裝飾、精巧手製飾物及甜點、家居及生活休閒用品等，還有由太古地產愛心大使義工隊製作的手作產品。

太古坊糖廠街市集設創意工作坊，詳情留意 Facebook 專頁上載的工作坊時間表。

香港東隅酒店、Mr & Mrs Fox、Enoteca 及 shiro 將提供美酒佳餚及炮製市集限定特色食品。

【INFO】

太古地產「Homemade Happiness」白色聖誕市集 2016

日期及時間︰11 月 25 日 12 nn - 8pm、11 月 26 日1pm - 7pm

地點︰灣仔星街小區

日期及時間︰12 月 1 日 12nn - 6pm、12 月 2 日 12 nn - 8pm、12 月 3 日1pm - 7pm

地點︰太古坊糖廠街．免費入場（歡迎捐款）
www.facebook.com/pg/SwireXmasFair/

2 尖沙咀 Hullet House 聖誕市集

好多人都話，尖沙咀 Hullet House 聖誕市集有氣氛，在 1881 古蹟内的市集選購各式各樣的聖誕精品，有北歐聖誕市集 feel。今年聖誕市集將於 12 月 2 日起動，齊集 39 個聖誕市集攤位，聖誕裝飾及手作飾物外，亦有多個美食攤位，可品嘗烤瑞士 Raclette 芝士配馬鈴薯、肉丸伴越橘醬、熱燻三文魚伴酸忌廉蛋黃醬、香料熱紅酒（Glögg Wine）等。而法國餐廳聖喬治内的柯利達廳，改裝成聖誕老人屋，遊人與聖誕老人拍照留念。此外，海利公館設聖誕老人郵政局，可寄出特別設計明信片並印上獨有印章。

Santa Claus Village 聖誕老人屋。

【INFO】

海利公館聖誕市集

日期及時間︰12 月 2 日 5pm - 11pm、12 月 3 日 12 nn - 11pm、12 月 4 日 12nn - 9pm

地點︰尖沙咀 1881 海利公館鴿舍中庭
www.facebook.com/HullettHouse1881/

3 觀塘南豐紗廠．好匠店坊市集

係咁嘅，南豐店堂是荃灣南豐紗廠的重要支柱，將設手作學習及零售，不過要 2018 年先開幕！咁關今年聖誕咩事﹖咪因為 12 月會先搞「南豐紗廠‧好匠店坊」手作坊及禮物市集，屆時有十家店鋪售賣貨品及提供訂製服務，亦設實體手作坊工場，逛開觀塘可順便睇睇。

【INFO】

「南豐紗廠．好匠店坊」手作坊及禮物市集

日期：12 月 3 日及 4 日．時間：12nn – 7pm

地點︰觀塘興業街 4 號 The Wave 一樓．查詢：3979 2300
www.facebook.com/themillshk

4 赤柱廣場德國童話村聖誕市集

今年赤柱廣場德國童話村聖誕市集，加料重臨，並加入童話元素，打造成德國童話村，全場焦點是 5 米高糖果屋，內有千支手工波板糖，諗起都覺甜到漏！話明德國主題，市集內有售德國直送木製手工藝精品、德國百年泰迪熊品牌 Steiff 熊公仔、Playmobil聖誕主題特別版產品，以及德國美食包括椒鹽卷餅 Pretzel 及傳統德國烤鴨。