Weekend 得閒，中大散策。
Text：Chun
中大，是中文大學，是一間大學（鬼唔知咩）……除咗返學上堂考試交 paper，也是影靚相勝地，也是假日散步勝地（同埋不少鬼故事的發生地，啋）。如果你在假日唔想屈在迫爆的商場，而想走去戶外，但又唔想山長水遠去行山……咁，去．中．大．吧！
So Strange 之美！
度度都可以唔去，呢度就 must 去！位於山頂新亞書院的天人合一湖，身處其中，就好似 Dr.Strange 初初被 Ancient One 引領去嗰個奇幻對摺世界！
好靚好奇妙啊！
基於實在太靚同太奇妙，所以勁多人排隊影相。
影結婚相勝地
前往天人合一湖時，必經新亞水塔呢片草地，好多新郎新娘專登嚟影結婚相。草地上有幾團金屬反光不明物體，遠睇，就好似《DQ》（嗱嗱嗱我係講緊日本國民 RPG game《Dragon Quest》吖）裡面嗰隻名物——金屬史萊姆。
冇呃你，真係有好多人鍾意返嚟影結婚相。
有一種宏偉叫——新亞水塔。
下午最後一片草坪
離開新亞前往同樣位於山頂的聯合書院，同樣有一片好草地。慵懶午後，Moody 得令人想起村上春樹短篇小說《下午最後一片草坪》。草地位於胡忠圖書館門前，中大生影畢業相的必然景點。
唔使驚，你大可以踏在軟軟的草地上。
新亞有水塔，聯合有水塔，你塔望我塔……
草地上有呢個小噴泉。但問心，幾唔夾囉。
中大本部，百萬大道。
落到山中，中大本部；面前是一條大道，百萬大道。
平時冇呢塊大幕，只因畢業禮舉行而臨時加建。大熱天時，走在呢條大道，好易中暑。
多年來流傳一個傳說：如果你捐過呢件放喺中大圖書館的藝術品，就會畢唔到業……解救方法？反方向捐多次囉。我本人就是成功例子，嘻。
相傳有個長髮女生……
崇基書院。小橋流水。在我讀書時（唉好多年前了），由師兄口中聽過一個都市傳說：兩個男生午夜時經過呢條小橋，見到一個長髮女生背住佢哋，企定定；男生們上前問佢有乜需需幫忙，女生擰轉頭——面上竟然乜都冇（注：即係冇五官）！據說此無臉女生曾跟一名師兄相戀，師兄畢業後飛去外國進修，點知一飛冇回頭……無奈女子苦苦等待，最後黯然而逝……唔信邪的我曾多次專揀午夜經過呢度，乜女都見不到。
相傳有個失戀男生……
又是崇基。荷花池。又有鬼故。又是午夜（唔通日頭咩），某個失戀的中大女生，去呢度散心，而不是上 fb 更新（事發當年未有 fb）；去到紅亭，遇上一個孤獨男生，一問之下，噢，原來同是中大失戀人。當女生想拍拍對方肩膀鼓勵對方時，竟然乜都拍唔到——個男仔竟然冇實體！？瀨嘢的驚恐，蓋過失戀的傷痛，女生飛奔回宿舍……第二日，唔覺意揭番幾日前的（實體）報紙，一則報道咁寫：「中大學生在荷花池為情自殺」……
撇除甚麼傳聞，荷花池，係靚嘅。
魚，全部都係魚。
散策建議：除非你打算徒步行上山，否則，建議喺大學火車站旁的校巴站，搭校巴先到新亞，然後再慢慢行落山。