大澳 8 個飲食熱點
No.1 文物酒店 High Tea
由舊大澳警署改建而成的大澳文物酒店，保留著濃濃的殖民地色彩。酒店內的唯一一間餐廳設計成玻璃屋 feel，裝修貫徹懷舊感。餐廳以大澳特色的 high tea 最出名，部分食物更加好有大澳特色，像用大澳蝦醬醃製的雞翼、加入少少鹹檸檬的餅仔、老店隱菇茶果、大澳餅店的合桃酥、紫貝天葵沖成的特飲等，兩位用才二百多元，幾抵食。人多仲可以叫下新推出小食如焗芝士粟米片，香口得來唔熱氣。順帶一提，酒店依家至 6 月尾推出優惠，住一晚包早餐低至 $1,330，仲可以玩埋整茶果、鹹蛋黃 workshop，加 $400 包埋浪漫二人晚餐，打算慢遊大澳的，不妨考慮住一晚。
真味．珍味下午茶 $218 / 2 位用 
焗芝士粟米片 $88 
Workshop 之一係去隱菇茶果度整茶果。Tai O Lookout
地址︰石仔街香港大澳文物酒店
電話︰2985 8383
No.2 堅．炭火風味雞蛋仔
唔少人入大澳的指定動作都係食番底炭火雞蛋仔。小區內供應炭火雞蛋仔的當然唔只一家，但要數最好食的首推呢家！呢檔位於小食集中地吉慶街，在沙翁店對面，記得認住黑超叔個嘜頭先係正品！黑超叔做出來的雞蛋仔外層焦香，粒粒好似食蛋糕仔咁軟綿，出面真係食唔到！
大澳炭燒雞蛋仔地址︰吉慶街 59 號地下
炭燒雞蛋仔 $15 No. 3 拳頭大鮮炸沙翁
呢家老餅店的沙翁在大澳爆紅！麵團的雞蛋分量特多，每次都係五六個少量現炸，新鮮熱辣，入口又唔會油淋淋，仲有成個拳頭咁大，好食！位置就在雞蛋仔對面，一次過掃埋，好方便！
即炒沙翁 $10 
大澳金門餅店地址︰吉慶街 66 號
No.4 棚屋精品咖啡
咖啡精想搵個地方坐下，可以到小區的人氣 cafe 蘇廬。店主是原居民，又是設計師，店子好有自己風格。半露天位對住棚屋景，好搶手。主打精品咖啡，有單品有拼配。店主好有自己原則，認為咖啡上已是最 perfect 的味道，因此不會有奶、糖奉上。來到大可點件 cake 配咖啡。
蘇廬地址︰吉慶街 86 號地下
電話︰9153 7453
冰搖濃縮咖啡 $45 No.5 大澳都有貓 cafe
至於貓奴嘛，入到大澳可以拜訪下呢間貓 cafe，貓店員都係老闆娘收養的流浪貓，隻隻有名，佢地不時在店內行來行去，好歡迎客人同佢地玩。食物以輕食為主，亦有貓咪拉花 cappuccino，門外仲有唔少貓樣精品、tee、tote bag 售賣。
貓澳地址︰吉慶街 67 號地下
電話︰9497 4206
水果日式鬆餅 $50 No.6 傳統炸油池
有番咁上下年紀的，都食過呢款炸油池 (即炸蘿蔔餅)，係老香港的街頭小食。這店做得味道好正宗，材料有大量蘿蔔絲、肉碎等，炸皮唔太厚，蘿蔔絲夠 juicy，味道好傳統。店內仲有另一款香妃卷，做法似整鹹 pancake，即場煎俾你，幾香口惹味。
炸油池 $10 
大澳小食地址︰吉慶街 70 號
No.7 大過人頭原隻滷墨魚
掃完吉慶街，係時係轉去另一條食街永安街。就在街口處遇上呢檔原隻巨形墨魚，個身大個人頭，把原隻游水墨魚以滷水輕滷，柯打時先切件碗上，墨魚肉厚，滷水味唔太濃，都幾鮮味。
復興行地址︰永安街 4D 舖
滷水墨魚 $45 No.8 老字號豆花
呢家豆花店，由街邊檔做到入舖，已經係第三代，仲供應唔少豆腐俾區內大小菜館。豆腐花以加拿大無基因改造黃豆炮製，以石磨磨豆，入口幾滑。
豆腐花 $12 
車站豆腐花地址︰永安街 57 號地下
電話︰2985 5318
