藍色海洋的傳說 取景地率先睇
由「長腿 Oppa」李敏鎬和女神全智賢主演的 《藍色海洋的傳說》剛於11月16日開播。劇中全智賢會飾演美人魚，穿越古今與飾演朝鮮縣令兒子和天才騙子的李敏鎬相戀，係繼《來自星星的你》後編劇朴智恩的最新力作，淨係班底都夠晒睇頭，仲勁揼本飛西班牙和帛琉拍外景！睇過預告片都知啲景有幾靚，而家就公開套劇的取景地！
場景01 西班牙 Villa Adriana 白色房 被踢到飛起
李敏鎬被超大力的人魚—全智賢踢到成個人飛起。
第二輪預告出現得最多的場景就係西班牙 Begur 的 Villa Adriana 酒店的一間白色客房，係劇中暫時變成李敏鎬的住所。預告中李敏鎬發現屋企變得好亂，周圍搵「犯人」，在衣帽間搵到吊在衣架上的全智賢，李敏鎬說自己打架不會讓女人，結果被全智賢踢到成個人飛起咗，場面相當搞笑。第一輯預告入面李敏鎬獨自坐在海邊的場景，就係間酒店附近的 Platja Fonda 沙灘。
這間酒店在劇中變成李敏鎬的住所，劇迷可以考慮去朝聖！
原來李敏鎬身後係一個在海邊的開放式泳池！
【info】Villa Adriana 8 BR/ 8 BA in Begur, Sleeps 12
地址：Camino Solo Peatonal, Fornells, Begur, Girona, Spain
房價：US$3,500 / 晚 (約 27,150 港元)，另加稅和 5% 服務費
場景02 西班牙 Steps of Sant Marti 中世紀街大逃走
劇中取景地曝光率最高是於 Steps of Sant Marti 拍攝的打鬥場面，李敏鎬打到幾個流氓落花流水，而全智賢企在後面的樓梯暫避，之後兩人仲一齊踩單車逃走。佢地穿藍色的情侶裝，非常合襯，踩單車穿過中世紀風街道的畫面好唯美。
李敏鎬之後拖實全智賢逃走，踩單車時還說「好吧，一起走」，暗示已對佢動心。
李敏鎬打嬴 3 個古惑仔後，佢地的老大拔槍，敏鎬態度即刻變到好恭順，更扶起那幾個古惑仔。
地址：Pujada de Sant Domènec, 17004 Girona, Spain
場景03 西班牙 Castell de Santa Florentina 城堡玩璧咚
這座城堡在第二輪預告出現咗幾秒，李敏鎬着住浴袍，將盛裝打扮的全智賢逼埋牆，問佢係咪飲醉咗，唔通城堡都係李敏鎬的另一住所？除咗《藍色海洋的傳說》外，這裏都係美劇 Game of Thrones 第 6 季的場景，劇迷去之前記得要上官網預約。
李敏鎬和全智賢係城堡玩壁咚。
【info】Castell de Santa Florentina
地址：Avenida Doctor María Serra, S/N, 08360 Canet de Mar, Barcelona, Spain
場景04 西班牙 Avenida de la Marina外大街 冧爆拖手過馬路
這一幕係全智賢光腳在馬路前擺出搞怪動作，表現美人魚未適應陸地的生活，之後李敏鎬拖住佢過馬路，好浪漫呀。
【info】Avenida de la Marina
地址：Paseo Dársena, 15001 La Coruña, Spain
場景05 帛琉 全智賢美人魚帛琉出場
劇組選擇太平洋島國的浮潛聖地─帛琉拍潛水戲，水清之餘仲可睇到不同種類的海洋生物。全智賢為求演好美人魚的角色，不斷練游水，穿上仿制魚鱗的衫後，真係似足平時電影睇到的美人魚。
場景06 韓國 濟州島 金寧迷路公園
第四輪預告入面，全智賢在大海問漁民首爾點去，提到目前正身處濟州島。雖然片入面睇唔出確實喺邊拍，但有粉絲影到李敏鎬在迷路公園拍劇，衣着同西班牙拍攝一樣，相信係補拍部分場景。
【info】金寧迷路公園
地址：濟州特別自治道濟州市舊左邑萬丈窟街 122
電話：+82(0)64 782 9266~7
營業時間： 8:30am - 6:30pm
票價：3,300 韓圜 (約 23 港元)
