抓緊櫻花季的尾巴 4間「嘗」櫻甜品店
近排係Facebook見得最多嘅除咗係抹茶甜品之外，最hit嘅一定係櫻花！大家唔係去日本、韓國追櫻，留係香港的都會去長洲、將軍澳睇櫻花。對於一班好食之徒，齋睇花又點會夠喉呢？一於賞完櫻花再去「嘗」櫻，即刻介紹4間有櫻花甜品食的甜品店畀大家，咁就唔使盲摸摸去追櫻啦！
ZUC.CCH.ERO 成棵櫻花樹食落肚
銅鑼灣上樓分子甜品店，店主曾於英國進修時裝設計，大廚曾於英國藍帶進修，由佢設計嘅甜品好味之餘，賣相勁吸引！好似呢棵櫻花樹，其實用咗士多啤梨味棉花糖做櫻花，樹幹則用上法國黑朱古力整成。樹下面有榛子朱古力慕絲、紅桑子啫喱、紅桑子脆粒及朱古力蛋糕，好豐富呀！
Para Para Sakura $138
樹底有野食架，有榛子朱古力慕絲、紅桑子啫喱、紅桑子脆粒及朱古力蛋糕，再加啲香草仔襯托吓。
Café & Meal MUJI 櫻花配白桃 Refresh味蕾
okay！你要真．櫻花味嘅甜品嘛，無問題！介紹大家去無印良品的Café & Meal MUJI，Café 由即日起至4月25日推出兩款櫻花甜品。甜品師特別用咗白桃及大長檸檬來襯托櫻花味，食落味道更加豐富，有花香的同時又有果香，好fresh！「櫻花大長檸檬慕絲」最底層是大長檸檬慕絲，面層是櫻花啫喱，中間夾有牛油脆粒增加口感。另一個「櫻花白桃慕絲蛋糕」，甜品師將白桃果蓉加忌廉做成慕絲，再加上一層櫻花糖水整成的啫喱，仲有一朵櫻花點綴。
櫻花白桃慕絲蛋糕 $52
櫻花大長檸檬慕絲 $42
Café & Meal MUJI
地址：銅鑼灣波斯富街99號利舞臺3樓、尖沙咀海港城海洋中心4樓407&415-419店、灣仔皇后大道東 183 號合和中心地下 G5B 店
電話：3971 3120
越後屋 勁吸睛櫻花刨冰
天氣開始熱，行完一輪睇完櫻花之後，不如去大坑新開的日式刨冰店越後屋食個冰降溫。由曾經於PMQ開Pop-up store「沖繩海之家」的日藉老闆主理，以日式刨冰、戚風蛋糕及咖啡為主的小店，最近都趁熱鬧推出期間限定的櫻花冰。賣相超fancy，軟綿綿的刨冰唧滿煉奶及用了日本櫻花及liqueur製成的粉紅色糖漿。刨入面不原來仲有北海道紅豆蓉及自家製白玉，Like越後屋的Facebook專頁仲會送多球雪糕！至於櫻花係咩味道呢？食落其實有啲似綿花糖味，mix埋糖漿、雪糕及紅豆蓉食，其實有少少過甜。
Sakura Kakigori $88（外賣）、 $98（堂食）
中間粒白玉都加咗櫻花糖漿，雖然無乜特別的味道，但勝在賣相討好，仲有北海道紅豆蓉做餡。
越後屋 Echigoya
地址：大坑施弼街27號地下
電話：2505 5250
Check in Tokyo 鹹味櫻花雪糕
早排出完麥精味雪糕的Check in Tokyo，由即日起至4月30日，趁櫻花季之餘同時慶祝開業一周年，所以推出期間限定櫻花味軟雪糕。先唔講味道，單憑佢粉紅色的外表已經好吸引（特別吸引一眾少女們）！味道又係點呢呢？唔好以為雪糕一定是甜，老闆話佢用咗日本櫻花再自行鹽漬，食落帶點鹹而且同梅味相似，幾特別，仲可以砌出唔同動物嘅樣，放上Facebook好有呃like嘅潛力！
Sakura Black Cone $36
Check in Tokyo
地址：旺角登打士街43P-43S號地下9B號鋪
